सचिन कदम, कर्जत

भटक्या कुत्र्यांची संख्या दिवसेंदिवस वाढत चालली आहे. या भटक्या कुत्र्यांना शहरासारख्या भागांत खाद्य पदार्थांचा हवा तसा पुरवठा होत नाही. कधी कधी वाटसरू भूतदया म्हणून त्यांना बिस्कीट सारखे अन्य पदार्थ खाऊ घालतात. हे पदार्थ त्यांची भूक वाढवत नाहीत तर, त्यांना मृत्यूच्या दाढेत खेचतात. मात्र भटक्या कुत्र्यांच्या बाबतीत इतका सखोल विचार कोणीही करत नाही. प्राण्यांची कळ काढली की ते हल्ला करतात. हे जितकं खरं आहे, तितकचं त्यांना पुरेपूर खाद्यसाठा मिळत नसल्याने भुकेमुळे अनेकदा ते हिंस्त्रक होतात आणि एखाद्यावर हल्ला करतात. अशीच एक घटना कर्जतमध्ये काही दिवसांपूर्वी घडली या घटनेत ९ वर्षांच्या मुलावर भटक्या कुत्र्यांनी हल्ला केला होता. या मुलाचा उपचारादरम्यान मृत्यू झाला आहे.

मिळालेल्या माहितीनुसार, ऋषिकेश पवार असे या मुलाचे नाव आहे. रायगडच्या कर्जत तालुक्यातील उमरोळी आशाने परिसरात एक ९ वर्षांचा ऋषिकेश रस्त्याने चालत असताना समोरून धावत येणाऱ्या कुत्र्यांनी त्याच्यावर हल्ला केला. क्षणभर या ऋषिकेशला समजलेच नाही की, नेमकं काय घडलं? कुत्र्यांनी हल्ला करताच आजूबाजूच्या नागरिकांनी त्याला वाचवण्यासाठी धाव घेतली. आणि कुत्र्यांच्या तावडीतून ऋषिकेशला वाचवलं. मात्र या हल्ल्यात ऋषिकेश गंभीर जखमी झाला.

ऋषिकेशवरच्या हल्ल्याचे घाव पाहता आजूबाजूच्या नागरिकांनी त्याला तातडीने उपचारासाठी मुंबईतील केईएम रुग्णालयात दाखल केले. मात्र त्याची मृत्यूशी झुंज अपयशी ठरली. उपचारादरम्यान ऋषिकेशचा मृत्यू झाला.

कुत्र्यांच्या मुलावरील हल्ल्याचा CCTV फुटेज समोर आला असून कर्जतमध्ये या घटनेने परिसरामध्ये भीतीचे वातावरण निर्माण झाले आहे. ऋषिकेशच्या मृत्यूने पवार कुटुंबियांवर दुःखाचा डोंगर कोसळला आहे. दरम्यान नागरिकांनी भटक्या कुत्र्यांना पकडण्यासाठी लवकरात लवकर नियोजन करा अशी मागणी केली आहे.