अभिजित देशमुख, साम टिव्ही, प्रतिनिधी

कल्याणमध्ये अत्यंत धक्कादायक घटना घडली आहे. कल्याण ग्रामीण भागात टिटवाळा परिसरात एका महिलेवर तिच्याच सासरे आणि दिराने सामूहिक अत्याचार केल्याची घटना घडली आहे. या घटनेने परिसरात एकच खळबळ उडाली आहे.

घरात कुणी नसताना विवाहितेवर तिचा सासरा, दीर आणि अल्पवयीन नातेवाईकाने सामूहिक अत्याचार केला आहे. आपल्यासोबत घडलेली घटना पीडितेने आपल्या पतीला सांगितली. मात्र पतीने तिच्यावरच संशय घेत तिला दगड विटांनी मारहाण केली. या प्रकरणी कल्याण तालुका पोलिसांनी पीडित महिलेचा सासरा, दिराला बेड्या ठोकल्यात आहेत, तर अल्पवयीन नातेवाईकाला ताब्यात घेत पुढील तपास सुरू केला आहे.

मिळालेल्या माहितीनुसार, कल्याण ग्रामीणमधील टिटवाळा परिसरात ही घटना घडली. पीडित विवाहित महिला घरात एकटी असल्याचा फायदा घेत तिच्यावर तिचा सासरा, दीर आणि एका अल्पवयीन नातेवाईकाने सामूहिक अत्याचार केला.

घडल्या प्रकाराबाबत पीडित महिलेने आपल्या पतीला सांगितलं. मात्र पतीने तिचे काही ऐकू न घेता तिच्यावर संशय घेत तिला दगड विटांनी मारहाण केली.

या मारहाणीत पीडित महिला जखमी झाली असून तिला उपचारासाठी रुग्णालयात दाखल करण्यात आलं आहे. या प्रकरणी पीडित महिलेने दिलेल्या तक्रारीनुसार, कल्याण तालुका पोलीस ठाण्यात सासरा, दीर, अल्पवयीन नातेवाईकासह तिच्या पती विरोधात गुन्हा दाखल करण्यात आला. पोलिसांनी सासरा, दिराला अटक केली आहे. तसेच अल्पवयीन नातेवाईकाला देखील ताब्यात घेत पुढील तपास सुरू केला आहे.