कल्याण पश्चिममधून एक धक्कादायक बातमी समोर येत आहे. गांधारी परिसरातील रॉयस गॅलेक्सी इमारतीची लिफ्ट सहाव्या मजल्यावरून थेट खाली कोसळली. या लिफ्टमध्ये एकूण ८ जण प्रवास करीत असल्याची माहिती आहे. त्यापैकी चार जण गंभीर जखमी असून, दोघांचे पाय फ्रॅक्चर झाले आहे. या घटनेनंतर परिसरात खळबळ उडाली आहे.

मिळालेल्या माहितीनुसार, इमारतीतील पाचव्या मजल्यावर राहणाऱ्या अंकित मेस्त्री यांच्या घरी गणेश दर्शनासाठी काही जण आले असताना हा अपघात घडला. गेल्या अनेक दिवसांपासून लिफ्ट मेंटेनेसमध्ये असल्याचे इमारतीतील रहिवाशांचे म्हणणे आहे. तरी देखील नादुरूस्त लिफ्ट सुरू ठेवण्यात आली होती.

इमारतीला दोन लिफ्ट असताना, अशा बिघडलेल्या लिफ्टचा वापर करून रहिवाशांच्या जीवाशी खेळ का करण्यात आला, असा संतप्त सवाल स्थानिकांनी उपस्थित केला आहे. या दुर्घटनेनंतर इमारतीच्या सुरक्षेचा प्रश्न ऐरणीवर आला आहे. या लिफ्टमध्ये एकूण ८ जण होते. त्यापैकी ४ जण जखमी, तर २ जणांचा पाय मोडल्यानं गंभीर जखमी आहेत. जखमींवर खासगी रूग्णालयात उपचार सुरू आहे.

दरम्यान, नादुरूस्त लिफ्ट सुरू ठेवण्यात आल्यामुळे रहिवाशांनी संताप व्यक्त केला. लिफ्ट मेंटेनन्स आणि फायर लाईन सुरक्षेकडे महापालिकेच्या अधिकाऱ्यांनी दुर्लक्ष केल्यामुळेच हा अपघात घडल्याचे स्थानिक रहिवाशांचे म्हणणे आहे. दरम्यान, या अपघातानंतर परिसरात काही काळ भीतीचे वातावरण निर्माण झाले होते.