संघर्ष गांगुर्डे, कल्याण - डोंबिवली

Kalyan Dombivli Municipal Commissioner Abhinav Goyal Suspends Two Clerks कल्याण डोंबिवली महानगरपालिकेत गेल्या अनेक महिन्यांपासून कल्याण डोंबिवली महानगरपालिकेचे आयुक्त अभिनव गोयल यांच्या अधिपत्याखाली मालमत्ता कर वसुलीवर अधिक भर दिला जात आहे. अशातच आता मालमत्ता कर वसुलीत हलगर्जीपणा करणाऱ्या अधिकाऱ्यांवर गोयल यांनी कडक कारवाईचा बडगा उगारला आहे. 9/आय प्रभागातील कर वसुलीच्या कामात अत्यंत कमी प्रगती झाल्याचे निदर्शनास आल्यानंतर गोयल यांनी दोन लिपिकांना तातडीने निलंबित करण्याचे आदेश दिले.

मालमत्ता कर वसुलीचे उद्दिष्ट पूर्ण करण्यासाठी कर संकलन विभागाकडून प्रयत्न सुरू असतानाच आयुक्तांनी 9/आय व 10/इ प्रभागांना अचानक भेट देत प्रत्यक्ष पाहणी केली. यावेळी सहायक आयुक्त, कर अधीक्षक आणि संबंधित भाग लिपिकांसोबत सविस्तर आढावा बैठक घेण्यात आली. बैठकीदरम्यान कर वसुलीची समाधानकारक कामगिरी न झाल्याचे स्पष्ट झाल्यानंतर 9/आय प्रभागातील भाग लिपिक अरविंद काळण आणि राजेंद्र पाटील यांच्यावर कामातील निष्काळजीपणाबद्दल तात्काळ निलंबनाची कारवाई करण्यात आली.

तसेच सर्व अधिकारी व कर्मचाऱ्यांना कर वसुली अधिक गांभीर्याने आणि जबाबदारीने करण्याचे सक्त निर्देश देण्यात आले. दरम्यान, कर लावण्यास अडथळा निर्माण करणाऱ्या सुमारे चार अनधिकृत अनिवासी मालमत्तांवरही निष्कासनाची धडक कारवाई करण्यात आली. महापालिकेने कर थकवणाऱ्यांवर कठोर भूमिका घेतल्याचे या कारवाईतून स्पष्ट झाले आहे.

मार्च हा चालू आर्थिक वर्षातील कर संकलनाचा शेवटचा महिना असल्याने कर थकबाकीदारांनी तत्काळ कर भरावा, अन्यथा कठोर कारवाईस सामोरे जावे लागेल, असा इशारा अतिरिक्त आयुक्त-2 योगेश गोडसे यांनी दिला आहे. महापालिकेच्या या धडक कारवाईमुळे कर थकबाकीदार आणि निष्काळजी कर्मचाऱ्यांमध्ये खळबळ उडाली आहे.