Kalyan-Badlapur Rain News: आज संध्याकाळच्या सुमारास पावसाने जोर धरल्याने कल्याण बदलापूर रोडवरती प्रचंड पाणी साठले असून, अंबरनाथ शहरातून जाणाऱ्या कल्याण बदलापूर रोड वरती वाहतुकीला अडथळा निर्माण होत आहे. या रोडला कल्याण बदलापूर रोड असंही म्हणतात.

कल्याणकडे येणारी वाहतूक मोठ्या प्रमाणात संध्याकाळच्या सुमारास होत असते. हा रोड एका बाजूने बंद करण्यात आला असून एकाच मार्गाने वाहतूक सुरू आहे.

यातच कल्याणमध्ये पावसाचा जोर वाढल्याने मुसळधार पावसाचा फटका लोकल सेवेलाही बसला आहे. रेल्वे रुळांवर पाणी साचले आहे. त्यामुळे लोकल वाहतूक पंधरा ते वीस मिनिटे उशिराने सुरू आहे. (Latest Marathi News)

भिवंडीत पावसाचं थैमान, पूरसदृश्य परिस्थिती, रस्त्यांवर पाणी

भिवंडीत पावसाचा जोर वाढला. शहरातील अनेक सखल भागांत पाणी साचले आहे. बाजार पेठ, शिवाजी चौक, नझराना कंपाउंड या परिसरात 4 ते 5 फूट पाणी साचले आहे. शेकडो दुकानांमध्ये पाणी घुसल्याने नुकसान झाले आहे.

दरम्यान, पावसामुळे कल्याण पश्चिमेकडे छत्रपती शिवाजी महाराज चौक, डॉ. बाबासाहेब आंबेडकर रोड परिसरात पाणी साचले आहे. त्यामुळे वाहनचालकांना, नागरिकांना तारेवरची कसरत करावी लागतेय. पावसाचा जोर कायम राहिल्यास शहरातील इतर सखल भागांत पाणी साचण्याची शक्यता व्यक्त करण्यात येत आहे.