Kalyan: गेल्या काही दिवसांपासून कल्याण शहर चर्चेचे केंद्र बनले आहे. कल्याणमध्ये राहणाऱ्या देशमुख कुटुंबाला त्यांच्या शेजारी राहणाऱ्या अखिलेश शुक्ला नावाच्या व्यक्तीने मारहाण केली. देशमुख कुटुंब मारहाण प्रकरण ताजे असताना आता पुन्हा कल्याणमधूनच परप्रांतीयांनी केलेल्या दादागिरीची माहिती मिळाली आहे.

कल्याणच्या अदिवली परिसरातील रागाई कॉम्प्लेक्स येथे राहणाऱ्या मराठी तरुणाला तेथेच राहणाऱ्या परप्रांतीय शेजाऱ्याने त्रास दिला आहे. मिळालेल्या माहितीनुसार, शेजारी राहणाऱ्या दोन कुटुंबामध्ये वाद सुरु झाला. साधारणपणे मुलांच्या खेळण्यावरुन भांडणाला सुरुवात झाली. त्या मराठी तरुणाच्या नऊ वर्षांच्या मुलीशी परप्रांतीय शेजाऱ्याने गैरवर्तवणूक केली. याबाबत जाब विचारायला गेल्यावर त्याने मराठी तरुणाला आणि त्याच्या पत्नीला, आईला जबर मारहाण केली.

बाचाबाची, भांडण यावरुन पुढे प्रकरण हे मारहाणीपर्यंत गेले. मारहाणीमध्ये मराठी तरुण जखमी झाला आहे. तसेच त्याच्या पत्नीला आणि आईलादेखील दुखापत झाली आहे. मारहाण करणाऱ्या परप्रांतीय माणसाचे नाव उत्तम पांडे असे आहे. मारहाण प्रकरणामध्ये उत्तम पांडे व्यतिरिक्त त्याच्या पत्नीवरही गुन्हा दाखल करण्यात आला आहे.

दरम्यान मानपाडा पोलीस ठाण्याचे वरिष्ठ पोलीस निरीक्षक राम चोपडे यांनी संबंधित प्रकरणाची माहिती दिली. "मुलांच्या खेळण्यावरुन भांडणाला सुरुवात झाली. त्यावर प्रकरण वाढत गेले. शेजारी राहणाऱ्या उत्तम पांडे या परप्रांतीय इसमाने आपल्या अल्पवयीन नऊ वर्षीय मुलीचा विनयभंग केला अशी मराठी तरुणाने आणि तिच्या कुटुंबाने तक्रार केली आहे. पोलिसांनी तपास करायला सुरुवात केली असून पांडे विरुद्ध गुन्हा दाखल केला आहे." अशी माहिती राम चोपडे यांनी दिली आहे. घटलेला मारहाणीचा प्रकार सीसीटीव्हीमध्ये कैद झाला आहे.

कल्याणमध्ये सलग दुसऱ्यांदा मराठी माणसाची परप्रांतीयांद्वारे मारहाण केल्याचे मोठे प्रकरण समोर आले आहे. या प्रकरणांवरुन स्थानिकांकडून चिंता व्यक्त केली जात आहे.