कल्याण रिंग रोडवर भीषण अपघात
सायकलस्वार कारने उडवलं ठार
अपघातामध्ये एकाचा जागीच मृत्यू
अपघाताचा व्हिडीओ व्हायरल
कल्याणमध्ये भरधाव कारने सायकस्वाराला चिरडलं. या अपघातामध्ये एकाचा जागीच मृत्यू झाला. कल्याणमधील गांधारी परिसरातील रिंग रोडवर हा अपघात झाला आहे. हा अपघात सीसीटीव्ही कॅमेऱ्यात कैद झाला असून याचा व्हिडीओ व्हायरल होत आहे. या प्रकरणी पोलिसांनी कारचालाकाविरोधात गुन्हा दाखल केला असून त्याचा शोध सुरू केला आहे.
कल्याणमधील रिंग रोड अपघातांचा हॉटस्पॉट बनत चालला आहे. या रिंग रोडवर आणखी एक भीषण अपघात झाला. कारने सायकलला जोरदार धडक दिली. अपघात इतका भीषण होता की सायकलस्वार फुटबॉलसारखा उडून दूरवर फेकला गेला. अपघातामध्ये सायकलस्वाराचा जागीच मृत्यू झाला. श्रीनिवास तांदळे असं मृत व्यक्तीचे नाव होते.
श्रीनिवास तांदळे सायकलवरून जात असताना अचानक मागून आलेल्या कारने त्यांना जोरदार धडक दिली. या अपघातामध्ये गंभीर जखमी झालेल्या श्रीनिवास यांचा जास्त रक्तस्राव झाल्याने जागीच मृत्यू झाला. या अपघातानंतर कारचालक घटनास्थळावरून फरार झाला. घटनेची माहिती मिळताच स्थानिक नागरिकांनी तातडीने मदतकार्य सुरू केले. मात्र गंभीर दुखापतीमुळे श्रीनिवास तांदळे यांचा मृत्यू झाला. या घटनेमुळे परिसरात हळहळ व्यक्त केली जात आहे.
या प्रकरणी खडकपाडा पोलिस ठाण्यात गुन्हा दाखल करण्यात आला असून फरार कारचालकाचा शोध पोलिस घेत आहेत. सीसीटीव्ही फुटेजच्या आधारे पोलिस आरोपीचा शोध घेत आहेत. दरम्यान, गांधारी रिंग रोडवर वारंवार होणाऱ्या अपघातांमुळे नागरिकांमध्ये भीतीचे वातावरण निर्माण झाले आहे. वाहतुकीचे नियम पाळले जात नसल्याने आणि वेगमर्यादा ओलांडणाऱ्या वाहनांमुळे अपघातांची संख्या वाढत असल्याचे स्थानिकांचे म्हणणे आहे. प्रशासनाने या मार्गावर तातडीने कडक उपाययोजना कराव्यात, अशी मागणी नागरिकांकडून केली जात आहे.