रोहिदास गाडगे, साम टिव्ही

पुण्यातील राजगुरूनगरमधून एक धक्कादायक बातमी समोर येत आहे. आंतरजातीय विवाहाला विरोध करत जावयाला मारहाण आणि लेकीचं अपहरण करणाऱ्या आईसह २ भावांना अटक करण्यात आली आहे. तसेच या संबंधित प्रकरणात सहभाग घेतलेल्या १५ जणांवर राजगुरूनगर पोलीस ठाण्यात गुन्हा दाखल करण्यात आला आहे. या प्रकरणानंतर परिसरात खळबळ उडाली असून, पोलिसांकडून पुढील तपास सुरू आहे.

प्राजकत्ता असं आरोपी आईच्या लेकीचं नाव आहे. तिचा विवाह विश्वानाथ गोसावी यांच्यासोबत झाला होता. त्यांचा प्रेमविवाह होता. मात्र, वयातील फरक आणि जातभेदामुळे नातेवाईकांनी या लग्नाला विरोध केला. पण तरीही नातेवाईकांच्या विरोधाला झुगारात दोघांनी एकमेकांशी लग्नगाठ बांधली.

याची माहिती प्राजक्ताच्या कुटुंबाला कळताच त्यांना राग अनावर झाला. प्राजक्ताची आई आणि २ भावांनी मिळून जावई विश्वानाथ गोसावी यांच्यावर हल्ला करण्याचा कट रचला. रचलेल्या प्लॅनिंगप्रमाणे जावईला मारहाण करण्यात आली. नंतर प्राजक्ताला जबरदस्तीनं घेऊन जाण्यात आले.

या घटनेची माहिती पोलिसांना मिळताच त्यांनी घटनास्थळी धाव घेतली. तसेच तत्काळ कारवाई करत मुलीची सुटका केली. तसेच तिला पती (विश्वानाथ गोसावी) यांच्याकडे सोपवण्यात आले. तसेच तक्रारीनुसार पोलिसांनी चौकशी करत प्राजक्ताची आई आणि तिच्या २ भावांना अटक केली आहे. तसेच या कटात सहभागी झालेल्या १५ जणांविरोधात राजगुरूनगर पोलीस ठाण्यात गुन्हा दाखल करण्यात आला.  दरम्यान, अटक करण्यात आलेल्या दोघा भावांना आज न्यायालयात हजर केले जाणार आहे. आरोपी आई पोलीसांच्या ताब्यात आहे.