संघर्ष गांगुर्डे, साम टीव्ही

कल्याण-डोंबिवलीत मुसळधार पाऊस सुरु आहे. कल्याण-डोंबिवलीतील खाडी पात्राच्या लगतच्या भागातील रहिवाशांना सतर्कतेचा इशारा देण्यात आला आहे. त्यात हवामान विभागाने आणखी दोन दिवस मुसळधार पावसाचा इशारा दिला आहे. त्यामुळे कल्याण-डोंबिवलीतील खाडी पात्राच्या लगत राहणाऱ्या रहिवाशांची चिंता वाढली आहे.

कल्याण-डोंबिवलीत काल रात्रीपासून सुरू झालेल्या मुसळधार पावसाने खाडीलगतचा भाग जलमय झालाय. पावसाच्या तडाख्यामुळे कल्याण खाडी दुतर्फी वाहू लागली आहे. या खाडीतील पाण्याची पातळी धोक्याच्या टप्प्याजवळ पोहोचली आहे. या पार्श्वभूमीवर महापालिका प्रशासन आणि आपत्कालीन यंत्रणा सज्ज झाली आहेत.

हवामान खात्याने अजून दोन दिवस मुसळधार पावसाचा अंदाज वर्तवल्याने परिस्थिती आणखी गंभीर होण्याची शक्यता आहे. गांधारी गणेशघाट पाण्याखाली गेला आहे. या पावसाचा जोर कायम राहिला तर खाडी शेजारील गावांना मोठा धोका निर्माण होऊ शकतो. कल्याण खाडीला काळू आणि उल्हास नद्या मिळून तीन नद्यांचा संगम झालाय.

कर्जत आणि कसारा भागातील मुसळधार पावसामुळे या नद्यांचे पाणी वेगाने कल्याण खाडीतून समुद्राच्या दिशेने सोडले जात आहे. यामुळे खाडीकिनारी राहणाऱ्या शेकडो घरांना पाण्याचा वेढा बसण्याची शक्यता निर्माण झाली आहे. कल्याण-डोंबिवलीतील परिस्थितीवर महापालिका आणि आपत्कालीन यंत्रणा लक्ष ठेवून आहेत. नागरिकांना खाडी-किनाऱ्यापासून दूर राहण्याचे आवाहन करण्यात आलं आहे.

सोलापुरात आदिला नदीला पूर

सोलापूर शहरातील आदिला नदीला पूर आला आहे. शहरातील स्वराज्य विहार, वैष्णवी हाईट्स, वसंत विहार भाग या 3 भागांमध्ये पाणी शिरलं आहे. या पूराच्या पाण्याचा आणखी प्रवाह वाढला तर आणखी सोसायटीमध्ये पाणी शिरण्याची शक्यता आहे. कोणताही अनुचित प्रकार घडू नये यासाठी महापालिका यंत्रणेसह पोलीस तैनात करण्यात आले आहेत.