राज्यात वर्षाअखेरीस गुलाबी थंडी पाहायला मिळते आहे. आज राज्यात सर्वत्र किमान तापमानात चढ उतार कायम राहणार आहे. तर उद्यापासून किमान तापमानाचा पारा घसरून थंडी वाढण्याची शक्यता हवामान विभागाने वर्तवली आहे. कमाल तापमानात देखील चढ उतार कायम राहणार आहे. वाढत्या थंडीमुळे ठिकठिकाणी शेकोट्या पेटल्या असून नागरिक थंडीचा मनमुराद आनंद घेत आहेत.

आज २०२५ मधला शेवटचा दिवस असून उद्या पासून इंग्रजी नव्या वर्षाला सुरुवात होणार आहे. कित्येक दिवसांपासून कमी झालेला गारठा नव्या वर्षाच्या स्वागताला पुन्हा एकदा सज्ज झाला आहे. मंगळवारी परभणीत ६.३ अंश सेल्सिअस तापमानाची नोंद झाली. धुळ्यात ६.६ अंश सेल्सिअस, निफाड येथे ६.८ अंश सेल्सिअस तापमान नोंदले गेले. अहिल्यानगर, जेऊर, ‎गोंदिया, ‎नागपूर, ‎यवतमाळ येथे ९ अंश, तर ‎पुणे, ‎नाशिक, अमरावती, भंडारा आणि ‎गडचिरोली येथे १० अंशांपेक्षा कमी तापमानाची नोंद झाली.

काल म्हणजेच मंगळवारी निफाड, धुळे, परभणी येथे गेली काही दिवस सातत्याने थंडीचा कडाका कायम असल्याचे दिसून आले आहे. उर्वरित राज्यात काही ठिकाणी किमान तापमानात घट झाली आहे. पहाटेच्या वेळी धुके आणि दव पडल्याचे चित्र कायम आहे. आज राज्यातील कमाल आणि किमान तापमानात चढ-उतार कायम राहणार असून थंडी टिकून राहण्याचा अंदाज वर्तवण्यात आला आहे .

उद्यापासून किमान तापमानात २ ते ३ अंशांची घट होण्याची शक्यता हवामान विभागाने वर्तवली आहे. वाढत्या थंडीचा आनंद घेण्यासाठी नागरिकांनी पर्यटनस्थळी तुफान गर्दी केली आहे. तर दुसरीकडे वाढत्या थंडीमुळे शेतकऱ्यांच्या काढणीला आलेल्या पिकांवर मोठा परिणाम झाला आहे. दरम्यान सरत्या वर्षाला निरोप देण्यासाठी राज्यात गुलाबी थंडी पडली आहे.