मुंबई शहराला पिण्याच्या पाण्याचा पुरवठा करणाऱ्या सात प्रमुख तलावांमध्ये यंदाच्या पावसाळ्यात समाधानकारक पाणीसाठा जमा झाला आहे. मात्र, गेल्या दोन वर्षांच्या तुलनेत यंदाचा एकूण पाणीसाठा काहीसा कमी आहे. ताज्या आकडेवारीनुसार, आज सातही तलावांमध्ये मिळून 13,98,318 दशलक्ष लिटर पाणीसाठा उपलब्ध होता. हा साठा एकूण जिवंत साठवण क्षमतेच्या 96.61 टक्के इतका आहे.

गेल्या वर्षी याच कालावधीत सात तलावांमध्ये 14,24,164 दशलक्ष लिटर, म्हणजेच 98.40 टक्के पाणीसाठा होता. तर 2024 मध्ये 14,24,107 दशलक्ष लिटर (98.39 टक्के) पाणीसाठा नोंदवला गेला होता. त्यामुळे यंदा पाणीसाठा तुलनेने कमी असला तरी मुंबईच्या पाणीपुरवठ्याच्या दृष्टीने स्थिती अद्याप समाधानकारक असल्याचे दिसून येते. सात तलावांपैकी विहार तलाव पूर्ण क्षमतेने भरलेला असून त्याचा साठा 100 टक्के आहे. तर तानसा तलावात 98.85 टक्के, भातसा तलावात 97.82 टक्के आणि तुळशी तलावात 96.89 टक्के पाणीसाठा आहे.

मध्य वैतरणा तलाव 96.42 टक्के भरला असून मोडक सागरमध्ये 93.66 टक्के, तर अप्पर वैतरणामध्ये 92.78 टक्के पाणीसाठा आहे. सध्या भातसा तलावात सर्वाधिक 7,01,399 दशलक्ष लिटर पाणीसाठा आहे. मध्य वैतरणामध्ये 1,86,600 दशलक्ष लिटर, अप्पर वैतरणामध्ये 2,10,653 दशलक्ष लिटर, तानसामध्ये 1,43,416 दशलक्ष लिटर, मोडक सागरमध्ये 1,20,756 दशलक्ष लिटर, विहारमध्ये 27,698 दशलक्ष लिटर आणि तुळशीमध्ये 7,796 दशलक्ष लिटर पाणी उपलब्ध आहे.

दरम्यान, जलाशय परिसरात नुकत्याच झालेल्या पावसात मोडक सागर येथे 57 मिमी, मध्य वैतरणा 55 मिमी, विहार 45 मिमी, तानसा 36 मिमी आणि तुळशी येथे 25 मिमी पावसाची नोंद झाली. काही दिवसांपासून विश्रांती घेतलेल्या पावसाने पुन्हा एकदा जोर धरला असल्याने राज्यातील नागरिकांना दिलासा मिळाला आहे. मुंबईसह उपनगरांमध्ये पावसाने दमदार बॅटिंग केल्याने आज पुन्हा धरण क्षेत्रात पाण्याची पातळीत वाढ झाली.