• बारामतीत ट्रकने दुचाकीला धडक दिल्याने बाप व दोन मुलींचा मृत्यू झाला.

• खंडोबानगर चौकात दुपारी १२ वाजता अपघात घडला.

• वडील जागीच ठार झाले, तर दोन्ही मुली रुग्णालयात जाताना मृत्युमुखी.

• पोलिसांनी ट्रक चालकाला ताब्यात घेतले

Baramati road accident father and two daughters die : पुणे जिल्ह्यातील बारामती शहरात आज हृदयद्रावक घटना घडली आहे. दुचाकी ट्रकच्या खाली आल्याने तीन जणांचा मृत्यू झाला. बापाचा जागेवरच मृत्यू झाला तर दोन चिमुकलीने रूग्णालयात जाताना प्राण सोडले. आज दुपारी १२ वाजता हा बारामतीमध्ये हा भयंकर अपघात झाला. या दुर्दैवी घटनेने संपूर्ण परिसर हादरालय. एका हायवा ट्रकने (क्रमांक MH 16-CA-0212) दुचाकीला (क्रमांक MH 42-B-4844) जोरदार धडक दिली. या अपघातात दुचाकीस्वार ओंकार राजेंद्र आचार्य आणि त्यांच्या दोन मुली, सई (वय 11) आणि मधुरा (वय 5) यांचा दुर्दैवी मृत्यू झाला. या घटनेने बारामतीत शोककळा पसरली आहे.

पोलिस निरीक्षक विलास नाळे यांनी दिलेल्या माहितीनुसार, ओंकार आचार्य हे आपल्या दोन्ही मुलींसह दुचाकीवरून खंडोबानगर चौकातून जात होते. त्याचवेळी वेगाने येणाऱ्या हायवा ट्रकने त्यांच्या दुचाकीला धडक दिली. या धडकेत तिघेही ट्रकच्या मागील चाकाखाली सापडले. ओंकार यांचा जागीच मृत्यू झाला, तर सई आणि मधुरा यांना तातडीने सिल्व्हर ज्युबिली रुग्णालयात दाखल करण्यात आले, मात्र उपचारापूर्वीच त्यांनी अखेरचा श्वास घेतला. अपघाताचे नेमके कारण अद्याप अस्पष्ट असून, पोलिसांनी हायवा चालकाला ताब्यात घेत तपास सुरू केला आहे.

घटनास्थळी जमलेली गर्दी आणि मृतदेहांचे हृदयद्रावक दृश्य पाहून अनेकांच्या डोळ्यात अश्रू तरळले. पोलिसांनी तातडीने कारवाई करत मृतदेह पोस्टमार्टमसाठी रुग्णालयात पाठवले. या घटनेने आचार्य कुटुंबीयांवर दुखाचा डोंगर कोसळला असून, परिसरात हळहळ व्यक्त होत आहे. या अपघाताने चौकात मोठ्या प्रमाणात वाहतूक कोंडी झाली होती. दरम्यान, स्थानिक नागरिकांनी खंडोबानगर चौकातील वाहतूक व्यवस्थापनावर सुधारणा करण्याची मागणी केली आहे.