रूपेश पाटील, पालघर प्रतिनिधी, साम टीव्ही मराठी

Palghar ZP recruitment scam News : पालघर जिल्हा परिषदेच्या भरती प्रक्रियेत मोठा गैरप्रकार उघडकीस आला असून, बनावट दिव्यांग प्रमाणपत्राच्या आधारे सरकारी नोकरी मिळवल्याचा आरोप असलेल्या एका महिला कर्मचाऱ्याला पालघर पोलिसांनी अटक केली आहे. या घटनेमुळे जिल्हा परिषद भरती प्रक्रियेच्या पारदर्शकतेवर गंभीर प्रश्न उपस्थित झाले आहेत.

मिळालेल्या माहितीनुसार, पुणे जिल्ह्यातील रूपाली तुषार टेंगळे यांनी दिव्यांग प्रवर्गातून अर्ज करत पालघर जिल्हा परिषदेत प्रयोगशाळा तंत्रज्ञ पद मिळवले होते. काही महिन्यांपूर्वी त्यांची डहाणू तालुक्यातील चिंचणी प्राथमिक आरोग्य केंद्रात नियुक्ती करण्यात आली होती. मात्र, त्यांच्या दिव्यांग प्रमाणपत्राबाबत संशय निर्माण झाल्यानंतर प्रशासनाने पडताळणी प्रक्रिया सुरू केली.

चौकशीदरम्यान संबंधित प्रमाणपत्र बनावट असल्याचे स्पष्ट झाले. त्यानंतर जिल्हा परिषद प्रशासनाने तत्काळ कारवाई करत रूपाली टेंगळे यांची सेवा समाप्त केली. याप्रकरणी पालघर पोलीस ठाण्यात फसवणूक, बनावट कागदपत्र तयार करणे आणि सरकारी नोकरी मिळवण्यासाठी खोटी माहिती सादर केल्याप्रकरणी गुन्हा दाखल करण्यात आला.

पोलिसांनी आरोपी महिलेला अटक करून न्यायालयात हजर केले असता, न्यायालयाने तिला चार दिवसांची पोलीस कोठडी सुनावली आहे. आता पोलिसांकडून बनावट प्रमाणपत्र नेमके कुठून तयार करण्यात आले, त्यामागे आणखी कोणी एजंट किंवा रॅकेट कार्यरत आहे का, याचा तपास सुरू आहे. पालघर जिल्हा परिषदेत विविध विभागांतील भरती प्रक्रिया सुरू असताना हा प्रकार समोर आल्याने इतर नियुक्त्यांचीही चौकशी होण्याची शक्यता व्यक्त केली जात आहे.

या प्रकरणामुळे जिल्हा परिषद भरती प्रक्रियेतील कागदपत्र पडताळणी यंत्रणेवर प्रश्नचिन्ह निर्माण झाले आहे. विशेषतः दिव्यांग आरक्षणातील भरती प्रक्रियेत अधिक काटेकोर तपासणीची गरज व्यक्त केली जात आहे. प्रशासनाने भविष्यात अशा प्रकारांना आळा घालण्यासाठी प्रमाणपत्रांची डिजिटल पडताळणी आणि वैद्यकीय समितीकडून पुनर्तपासणी करण्याबाबत विचार सुरू केल्याची माहिती सूत्रांकडून मिळत आहे.