संजय गडदे, साम टीव्ही

मुंबईतील गोरेगाव पश्चिम परिसरात वाढदिवसाच्या रीलसाठी धोकादायक कृत्य केल्याचा प्रकार समोर आला आहे. जोगेश्वरी पश्चिम येथील कार डीलर फहाद शेख याने वाढदिवसानिमित्त रील तयार करताना राम मंदिर रोडजवळील सोमाणी ग्राम परिसरात, सनटेक सिटी 4th Avenue निवासी संकुलाबाहेरील रस्त्यावर पेट्रोल ओतून आग लावल्याचा आरोप आहे.

या प्रकारामुळे एमएमआरडीएच्या रस्त्याचे चार ठिकाणी नुकसान झाल्याची माहिती समोर आली आहे. तसेच घटनास्थळी जवळच अनेक वाहने उभी असल्याने मोठी दुर्घटना घडण्याची शक्यता होती. आग भडकली असती तर पार्क केलेल्या वाहनांनाही फटका बसू शकला असता, अशी भीती व्यक्त केली जात आहे.

या धोकादायक प्रकारामुळे स्थानिक रहिवाशांमध्ये संतापाचे वातावरण असून सुरक्षेच्या दृष्टीने गंभीर चिंता व्यक्त केली जात आहे. सार्वजनिक ठिकाणी जीव धोक्यात घालून सोशल मीडियासाठी रील बनवण्याच्या प्रकारांवर कठोर कारवाई करण्याची मागणी सामाजिक कार्यकर्ते डॉ.बिनु वर्गीस यांनी मुंबई पोलिसांना ट्विट करून केली आहे. दरम्यान, या प्रकरणी मुंबई पोलिसांनी कठोर भूमिका घ्यावी आणि संबंधित व्यक्तीवर कडक कारवाई करावी, अशी मागणी स्थानिकांकडून करण्यात येत आहे.