Building Part Collapse: घाटकोपरमधून एक मोठी बातमी समोर आली आहे. राजेवाडी रुग्णालय परिसरात असलेल्या दोन मजली बंगल्याचा काही भाग कोसळलाय. या घटनेत काही व्यक्ती अडकल्याची माहिती मिळाली आहे. पोलिसांनी घटनास्थळी धाव घेत बचावकार्य सुरु केलंय. (Latest Marathi News)

मिळालेल्या माहितीनुसार, सदर घटनेत एक वृद्ध महिला आणि एक पुरुष ढिगाऱ्याखाली अडकले असल्याचे सांगण्यात आले आहे. घटनास्थळी पोलीस आणि अग्निशमन दल दाखल होत ढिगाऱ्याखाली अडकलेल्या लोकांना बाहेर काढण्याचा प्रयत्न करत आहेत.

अपघाताच्या या घटनेनं परिसरात एकच गोंधळ उडालाय. राजेवाडी रुग्णालयाबाहेर बघ्यांनी गर्दी केलीये. दोन मजली इमारत असलेल्या या बंगल्याच्या इतर भिंतींना देखील भेगा पडल्या आहेत. यामुळे आणखीन दुर्घटना घडण्याची शक्यता वर्तवली जात आहे.

मुंबईत काल सकाळपासून पावसाने जोर धरला आहे. मुसळधार पावसाने नागरिकांचे नुकसान होत आहे. अनेक ठिकाणी नागरिकांच्या घरात पाणी शिरलं आहे. तर रस्त्यांवर देखील सखल भागात पाणी साचलंय. या पावसामुळेच बंगल्याच्या इमारतीचा काही भाग कोसळ्याचा अंदाज बांधला जात आहे.