पुण्यामध्ये जीबीएस आजारामुळे चिंता आणखी वाढली आहे. जीबीएसने पुण्यात हात पाय पसरले असून आणखी एका जीबीएस रुग्णाचा उपचारादरम्यान मृत्यू झाला आहे. पुण्यामध्ये जीबीएसमुळे आतापर्यंत ९ जणांचा मृत्यू झाला आहे. या आजारामुळे सर्वाधिक मृत्यूचे प्रमाण पुण्यात जास्त आहे. त्यामुळे पुणेकरांमध्ये सध्या भीतीचे वातावरण आहे. अशामध्ये पालिका प्रशासनाकडून उपाययोजना आखल्या जात आहेत.

मिळालेल्या माहितीनुसार, पुण्यात जीबीएसने ९ वा बळी घेतला आहे. पुण्यातल्या वाघोली येथे राहणाऱ्या ३४ वर्षीय तरुणाचा जीबीएस आजारामुळे मृत्यू झाला आहे. काही दिवसांपूर्वी या तरुणाला जीबीएसची लागण झाली होती. त्याच्यावर ससून रुग्णालयात उपचार सुरू होते. या रुग्णाला श्वसनाला त्रास होत होता आणि स्नायू खूपच कमजोर झाले होते. ससून रुग्णालयात या तरुणावर ३ फेब्रुवारीपासून उपचार सुरू होते.

उपचार सुरू असताना देखील या तरुणाचा त्रास काही कमी झाला नाही उटला त्याचा त्रास वाढत गेला. अखेर उपचारादरम्यान या तरुणाने प्राण सोडले. या तरुणाच्या मृत्यू नंतर पुण्यात जीबीएस रुग्णांच्या मृतांचा आकडा ९ वर गेला आहे. तर राज्यातील जीबीएस रुग्णांच्या मृत्यूचा आकडा १४ वर गेला आहे. त्यामुळे चिंता आणखी वाढली आहे.

दरम्यान, पुण्यामध्ये सध्या जीबीएसचे एकूण २१० रुग्ण आहेत. यामधील ४१ रुग्णांवर आयसीयूमध्ये उपचार सुरू आहेत. २० रुग्ण व्हेंटिलेटरवर आहेत. तर उर्वरीत रुग्णांवर जनरल वॉर्डमध्ये उपचार सुरू आहेत. राज्यात जीबीएस आजार वेगाने हात पाय पसरवत आहे. राज्यातील पुणे, सोलापूर, मुंबई, नागपूर, सांगली, कोल्हापूर आणि धुळयामध्ये जीबीएसचे रुग्ण आढळले आहेत. पुण्यानंतर कोल्हापूरमध्ये ३ रुग्णांचा जीबीएसमुळे मृत्यू झाला आहे.