गोपाळ मोटघरे, पिंपरी

पिंपरी -चिंचवडमध्ये गणपती विसर्जनला गालबोट लागल्याची घटना घडली. लाडक्या गणरायाला निरोप देत असताना मोठी दुर्घटना घडली. गणपती विसर्जन करत असताना चौघे जण नदीत बुडाले. यापैकी दोघांचा मृत्यू झाला. त्यांचे मृतदेह नदीतून बाहेर काढण्यात आले. तर दोघे जण बेपत्ता असून त्यांचा शोध घेतला जात आहे. ही घटना चाकण पोलिस स्टेशनच्या हद्दीत घडली.

मिळालेल्या माहितीनुसार, गणपती विसर्जन करताना तीन वेगवेगळ्या घटनेत पाण्यात बुडून दोन जणांचा दुर्दैवी मृत्यू झाला. तर दोन जण अजूनही बेपत्ता आहेत. चाकण पोलिस स्टेशन हद्दीत अनंत चतुर्दशीच्या दिवशी ही दुर्दैवी घटना घडली. चाकण पोलिस स्टेशन हद्दीतील वाकी बुद्रुक या ठिकाणी गणपती विसर्जन करत असताना २१ आणि २७ वर्षीय तरुणांचा नदीत बुडून मृत्यू झाला. त्यापैकी एकाचा तरुणाचा मृतदेह अग्निशमन दलाने नदीपात्रातून बाहेर काढला आहे. तर दुसऱ्या तरुणाचा शोध अग्निशमन दल घेत आहे.

तर शेल पिंपळगाव येथे गणपती विसर्जन करताना एका ४५ वर्षाचा व्यक्तीचा नदीमध्ये बुडून मृत्यू झाला. तर चाकण पोलिस स्टेशन हद्दीतील बिदरवाडी या ठिकाणी गणपती विसर्जन करत असताना एक व्यक्ती विहिरीत बुडाला. या व्यक्तीचा मृतदेह देखील विहिरी बाहेर काढण्यात आला आहे. ३ वेगवेगळ्या घटनांमध्ये अशी माहिती पिंपरी चिंचवड शहर पोलिसांनी दिली आहे

दरम्यान, ठाणे जिल्ह्यातील आसनगावमध्ये गणपती विसर्जनादरम्यान ३ तरुण वाहून गेले. आसनगावच्या मुंडेवाडीमध्ये ही घटना घडली. आसनगाव येथील मुंडेवाडी या ठिकाणी राहणारे कुलदीप जाखेरे (वय ३२ वर्षे), दत्तू लोटे (वय ३० वर्षे) आणि प्रतीक मुंढे (वय २३ वर्षे) हे तिघे जण गणपती विसर्जनासाठी भारंगी नदीत उतरले होते. पण पाण्याचा अंदाज न आल्यामुळे तिघेही वाहून गेले. त्यांचा शोध घेतला जात आहे.