मुंबई : मध्य रेल्वेवरील मुंब्रा ते दिवा दरम्यान धावत्या लोकलमधून पडून ४ जणांचा मृत्यू झाल्याची घटना ताजी असताना आणखी एक धक्कादायक घटना घडली आहे. मध्य रेल्वेवरील घाटकोपर स्टेशनवर एक प्रवासी लोकल आणि प्लॅटफॉर्मच्या फटीत प्रवासी अडकल्याची घटना घडली. घाटकोपरमधील या घटनेने मध्य रेल्वे विस्कळीत झाली. या प्रवाशाचा जीव वाचवण्यासाठी रेल्वे पोलीस तातडीने धावले. मात्र, दुर्दैवाने या प्रवाशाचा मृत्यू झाला आहे.

मुंबईतील सुरक्षित रेल्वे प्रवासाचा प्रश्न पुन्हा एकदा ऐरणीवर आला आहे. मुंबई लोकल ट्रेनमधून प्रवाशांना जीव मुठीत घेऊन प्रवास करावा लागत आहे. काही दिवसांपूर्वी लोकलच्या फुटबोर्डावरून प्रवास करणारे प्रवासी ट्रॅकवर पडले होते. ट्रॅकवर पडलेल्या १२ प्रवाशांपैकी ४ जणांचा मृत्यू झाला होता. मुंब्रा जवळील घटना ताजी असताना आता घाटकोपरमध्ये लोकल आणि प्लॅटफॉर्मच्या फटीत अडकून एका प्रवाशाचा मृत्यू झाला आहे.

लोकलमधून उतरताना प्रवाशाचा तोल गेला. त्यानंतर हा प्रवासी लोकल आणि प्लॅटफॉर्मच्या फटीत अडकला. प्रवासी अडकल्यानंतर रेल्वे पोलीस आणि प्रवासी मदतीला धावले. पोलिसांनी तातडीने मदत सुरु केली. या घटनेत प्रवाशाच्या छातीला जबर मार लागला होता. या प्रवाशाला लोकल आणि प्लॅटफॉर्मच्या फटीतून बाहेर काढलं. त्यानंतर त्याला तातडीने घाटकोपरमधील राजावाडी रुग्णालायात दाखल केले. मात्र, या प्रवाशाचा उपचारादम्यान मृत्यू झाला.