संघर्ष गांगुर्डे/साम टीव्ही न्युज

डोंबिवली पूर्वेकडील फडके रोडवरील लक्ष्मी सागर इमारतीत आज ऐन रहदारीच्या वेळी धक्कादायक घटना घडली. इमारतीच्या टेरेसवरील भिंतीचा काही भाग अचानक कोसळून थेट रस्त्यावर पडल्याने परिसरात एकच गोंधळ उडाला. सुदैवाने या घटनेत कोणतीही जीवितहानी झाली नाही. मात्र, भिंतीचे अवजड तुकडे रस्त्यावर पडल्याने काही दुकानांचे नुकसान झाले असून रस्त्यावर उभ्या असलेल्या दुचाकी व चारचाकी वाहनांचेही नुकसान झाल्याची माहिती आहे.

घटनेची माहिती मिळताच कल्याण-डोंबिवली महानगरपालिकेचे अधिकारी, आपत्ती व्यवस्थापन पथक आणि अग्निशमन दल तातडीने घटनास्थळी दाखल झाले. खबरदारीचा उपाय म्हणून लक्ष्मी सागर इमारतीतील सर्व १८ फ्लॅटमधील रहिवाशांना सुरक्षितपणे बाहेर काढण्यात आले असून सर्व रहिवासी सुरक्षित असल्याचे प्रशासनाकडून सांगण्यात आले आहे.

फडके रोडसारख्या गजबजलेल्या परिसरात ही घटना घडल्याने काही काळ वाहतुकीवरही परिणाम झाला. पालिकेकडून परिसराची पाहणी सुरू असून इमारतीची संरचनात्मक तपासणी करून पुढील कारवाई करण्यात येणार असल्याचे अधिकाऱ्यांनी सांगितले आहे.दरम्यान, जुन्या व धोकादायक इमारतींच्या सुरक्षिततेचा प्रश्न पुन्हा एकदा ऐरणीवर आला असून अशा इमारतींची नियमित तपासणी करण्याची मागणी नागरिकांकडून होत आहे.