महायुती सरकारला विधानसभा निवडणुकीत मुख्यमंत्री लाडकी बहीण योजनेमुळे भक्कम पाठिंबा मिळाला होता. या योजनेला वर्षपूर्ती झाली असून, ही योजना अजूनही अविरत सुरू आहे. या योजनेमुळे राज्यातील लाभार्थी महिलांना आर्थिक पाठबळ मिळालं. या योजनेतून मिळत असलेल्या निधीतून अनेकांनी व्यवसाय देखील सुरू केला आहे. रक्षाबंधनाच्या दिवशी उपमुख्यमंत्री एकनाथ शिंदे यांनी अशाच एका लाडक्या बहिणीच्या फुड स्टॉलला भेट दिली. महिलेला सरकारकडून मिळत असलेल्या आर्थिक मदतीतून त्यांनी फूड स्टॉलला सुरू केलाय. एकनाथ शिंदे यांनी बिझनेस वुमनचं कौतुक केलं आहे.

ठाण्यात योगिता खेवटकर या महिलेनं लाडकी बहीण योजनेतून मिळत असलेल्या निधीतून फुड स्टॉल उभारलं. त्यांचं एकनाथ शिंदेंनी कौतुक केलं आहे. 'आज लाडकी बहीण फूड कॉर्नर मी बघितलं. या योजनेच्या माध्यमातून या ताईंनी लाडकी बहीण फूड कॉर्नर उभारलं. अनेक लाडक्या बहिणींनी अशा प्रकारे व्यवसाय उभारले. फूड स्टॉल उभारल्यामुळे कुटुंबाला आधार मिळतोय. लाडक्या बहिणींचे सक्सेस स्टोरी खूप आहे.'

'लाडक्या बहिणींना सक्षम करणं हाच महायुतीचा उद्देश आहे. या योजनेचा पुरेपूर योग्य वापर लाडक्या बहिणींनी केला आहे. त्याचा मला खूप आनंद आहे', असं एकनाथ शिंदे म्हणाले. 'या फुल स्टॉलवर संपूर्ण कुटुंब काम करत आहे. बाळासाहेबांनी सांगितलं होतं, नोकऱ्या मागण्यापेक्षा नोकऱ्या देणार बना आणि ते काम ताईंनी केलंय.

80 टक्के समाजकारण 20 टक्के राजकारण बाळासाहेब ठाकरे आणि धर्मवीर आनंद दिघे यांचा मूलमंत्र आहे. हे पुढे नेण्याचं काम आम्ही करतोय. विरोधकांनी इथे येऊन चहा प्यावा, नाश्ता करावा', असा खोचक टोलाही यावेळी एकनाथ शिंदे यांनी लगावला.