दिल्लीतून मोठी बातमी समोर आली आहे. दिल्लीतून पुण्याच्या दिशेने जाणाऱ्या स्पाइसजेट या विमानाच्या उड्डाणानंतर मोठी दुर्घटना घडली. विमानातील प्रवाशांना विमानात बसल्यानंतर अचानक तापमान वाढलं आणि प्रवाशांची अक्षरशः घुसमट झाली. तापमान वाढतच गेल्याने अनेक प्रवासी घामाने पूर्णपणे भिजले. काही प्रवाशांना श्वास घेण्यासही त्रास होऊ लागला. दरम्यान प्रवाशांना होत असलेला त्रास लक्षात येऊन सुद्धा विमान रणवेवर घेण्यात आल्याचा गंभीर आरोप एका प्रवाशाने सोशल मीडियाच्या माध्यमातून केला आहे. याप्रकरणी आता विमान कंपनीची चौकशी होणार का? हे पाहणं महत्त्वाचं ठरेल.

व्हायरल झालेल्या एका सोशल मीडिया पोस्टनुसार, स्पाइसजेट या नामंकित कंपनीचे विमान दिल्लीहून पुण्याकडे निघाले होते. प्रवासी विमानात बसले. यानंतर हळूहळू विमानाने टेक ऑफ घेण्यास सुरुवात केली. यानंतर जे घडलं ते हादरवून टाकणार होत. विमानाने उड्डाण घेतल्यानंतर काही क्षणात तापमान वाढलं आणि प्रवाशांना श्वास घ्यायला त्रास होऊ लागला. काही प्रवासी अक्षरशः घामाने चिंब भिजले होते.

परिस्थिती असह्य झाल्यानंतर प्रवाशांनी आरडाओरडा करत विमान पुढे घेऊन जाण्यास विरोध केला. अशा परिस्थितीत विमान उडवणे धोकादायक असल्याचे सांगत सर्व प्रवाशांनी उड्डाणास नकार दिला. यावेळी कॅप्टन आणि संबंधित कर्मचाऱ्यांकडून प्रवाशांशी अरेरावी करण्यात आली आणि धमकावल्याचा आरोपही काही प्रवाशांनी केला आहे.

यानंतर विमानात तांत्रिक बिघाड असल्याचे लक्षात आल्याचे सांगण्यात येत आहे. त्यामुळे वाढलेल्या तापमानाचा प्रकार आणि प्रवाशांना झालेला त्रास अधिक गंभीर बनला आहे. या घटनेनंतर संतप्त प्रवाशांनी विमानतळावरच ठिय्या मांडला. खराब सेवा देऊन प्रवाशांच्या सुरक्षिततेशी खेळल्याचा आरोप स्पाइसजेटवर करण्यात आला आहे. या प्रकरणाची केंद्रीय नागरी विमान वाहतूक मंत्रालयाने चौकशी करून दोषींवर कठोर कारवाई करावी, अशी मागणी प्रवाशांकडून करण्यात येत आहे.दरम्यान आता सरकार काय निर्णय घेणार हे पाहणे महत्त्वाचे ठरेल.