>> अभिजीत देशमुख

Kalyan Crime News : कामावरुन घरी परतणाऱ्या तरुणीची एका तरुणाने भर रस्त्यात छेड काढून तिला मारहाण केल्याची घटना कल्याणमध्ये घडली आहे. एवढंच नाही तर तरुणीच्या मदतीला धावलेल्या दोन तरुणांना देखील बेदम मारहाण केल्याची घटना मंगेशी पॅराडाईज परिसरात घडली आहे.

तरुणीच्या मदतीला धावलेल्या योगेश चौधरी आणि उत्कर्ष सिंग या दोन तरुणांवर कल्याण डोंबिवली महापालिकेच्या रुक्मीणीबाई रुग्णालयात उपचार सुरु आहेत. दरम्यान पीडित तरुणीने दिलेल्या तक्रारीवरून खडकपाडा पोलिसांनी प्रवण कोनकर नवाच्या तरुणासह ८ जणांविरोधात गुन्हा दाखल केला आहे.

पोलिसांनी या प्रकरणात मारहाण करणाऱ्या चार जणांना अटक केली आहे. दर्शन कोनकर, हेमंत राजा कोट, सनी मालवी, अमन जयस्वाल अशी अटक करण्यात आलेल्या तरुणांची नावे आहेत. या प्रकरणात पोलिसांनी एका अल्पवयीन मुलाला देखील ताब्यात घेतले आहे. (Latest Marathi News)

मिळालेल्या माहितीनुसार, कल्याण पश्चिमेत राहणारी 22 वर्षीय तरुणी रात्री कामावरुन घरी परतत असताना प्रणव कोनकर याने तिला भर रस्त्यात अडवले आणि तिची छेड काढली. यानंतर त्याने तिला मारहाण करण्यास सुरुवात केली. पीडित तरुणीने आरडाओरडा केल्यानंतर योगेश आणि उत्कर्ष हे दोन तरुण तिच्या मदतीसाठी धावून आले. त्यांनी तिला मदत करण्याचा प्रयत्न केला.

परंतु प्रणव कोनकरने त्याच्या मित्रांना बोलावून घेतले आणि त्या सर्वांनी मिळून योगश चौधरी आणि उत्कर्ष सिंग या दोघांना लाकडी काठीने आणि बॅटने बेदम मारहाण केली. या मारहाणीत योगेशचं डोकं फुटलं, तर उत्कर्षच्या हाताला गंभीर दुखापत झाली. या दोघांना रुक्मीणीबाई रुग्णालयात उपचारासाठी दाखल करण्यात आले आहे. (crime news)