रोहित कदम, साम प्रतिनिधी

देशभरात गाजलेल्या नीट पेपरफुटी प्रकरणी कॉकरोच जनता पार्टीचे संस्थापक अभिजीत दिपके यांनी जंतर मंतरवर आंदोलन सुरू केलंय. केंद्रीय शिक्षणमंत्री धर्मेंद्र प्रधान यांच्या राजीनाम्याच्या मागणीसाठी पर्यावरणवादी कार्यकर्ते सोनम वांगचुक हेदेखील आंदोलनात सहभागी झाले आहेत. एव्हंढच नाहीतर सोनम वांगचुक यांच्या नेतृत्वात येत्या 20 जुलैला संसदेवर भव्य मोर्चा काढण्यात येणार आहे.

मात्र गुंड पाठवून हे आंदोलन उधळण्याचा कट केला जात असल्याचा आरोप अभिजित दीपके यांनी पोस्टमध्ये केलाय. उद्धव ठाकरेंनी या आंदोलनाला पाठिंबा देण्यासाठी पत्रकार परिषद घेतलीये. यावेळी त्यांनीही केंद्र सरकारवर निशाणा साधताना खळबळजनक दावा केलाय. विशेष म्हणजे, सोनम वांगचुक आमरण उपोषणाला बसले आहेत. वांगचुक यांची प्रकृती आता कमालीची खालावलीय. त्यामुळे अण्णा हजारेंनीही या उपोषणात सहभागी व्हावं असं आवाहन संजय राऊतांनी केलंय.

येत्या 20 जुलैला निघणाऱ्य़ा संसदेवरील भव्य मोर्चापूर्वीच या आंदोलनाबाबत काय घडामोडी घडतात याबाबत उत्सुकता आहे. तर दुसरीकडे विरोधकांच्या हातात या आंदोलनाचं आयतं कोलीत असल्यामुळे केंद्र सरकार प्रधान यांचा राजीनामा घेऊन संसदेच्या पावसाळी अधिवेशनापूर्वी हा मुद्दा निकाली काढणार का? याकडे लक्ष लागलंय.