Pune News : पुण्यातील गुन्हेगारीचं प्रमाण दिवसेंदिवस वाढत आहे. रोजच्यारोज काहीना काही गुन्हेगारीच्या घटना पुण्यातून समोर येत आहेत. महिलांचे दागिने हिसकावणाऱ्या चोरट्यांनीही धुमाकूळ घातला आहे. चोरट्यांनी वेगवेगळ्या घटनेत महिलांकडील तीन लाख रुपयांचे दागिने हिसकावून नेल्याच्या घटना समोर आल्या आहेत.

पर्वती पायथा, कात्रज-कोंढवा रस्ता आणि बिबवेवाडी भागात या घटना घडल्या. पर्वती गाव परिसरात राहणारी महिला सकाळी सव्वासहाच्या सुमारास नंदादीप एज्युकेशन सोसायटी परिसरातून निघाली होती. त्यावेळी दुचाकीस्वार चोरट्यांनी महिलेच्या गळ्यातील ७५ हजार रुपयांचे मंगळसूत्र हिसकावून नेले. महिलेने याबाबत दत्तवाडी पोलीस ठाण्यात फिर्याद दिली असून पोलीस याबाबत तपास करत आहेत.  (Latest Marathi News)

कात्रज-कोंढवा रस्त्यावरुन निघालेल्या एका महिलेच्या गळ्यातील एक लाख ३५ हजार रुपयांचे मंगळसूत्र, लक्ष्मीहार असा एक लाख ३५ हजार रुपयांचा ऐवज दुचाकीस्वार चोरट्यांनी हिसकावून नेला. महिलेने याबाबत कोंढवा पोलीस ठाण्यात फिर्याद दिली आहे. तर बिबवेवाडी भागात सकाळी पावणेआठच्या सुमारास एका महिलेच्या गळ्यातील एक लाख रुपयांची सोनसाखळी दुचाकीस्वार चोरट्यांनी हिसकावून नेल्याची घटना घडली.

महिलांच्या गळ्यातील दागिने हिसकावण्याच्या घटना सकाळी 6 ते 8 वाजण्याच्या सुमारे घडल्या आहेत. बिबवेवाडी, पर्वती पायथा तसेच कात्रज-कोंढवा रस्त्यावर दागिने हिसकावण्याच्या घटना एकपाठोपाठ घडल्या आहेत. वेगवेगळ्या भागात दागिने हिसकावणारे चोरटे एकच असावेत असा संशय पोलिसांना आहे. पोलिसांनी सीसीटीव्ही फूटेज ताब्यात घेतले असून चोरांचा शोध घेण्यात येत आहे.