प्रवाशांनो दिवाळीच्या सुट्टीत बाहेर फिरण्याचा प्लॅन करत असाल तर आधी रेल्वेचं वेळापत्रक जाणून घ्या. उद्या मध्य रेल्वेवर विद्याविहार-ठाणे दरम्यान पाचव्या व सहाव्या मार्गावर, तसेच हार्बर मार्गावर सीएसएमटी ते चुनाभट्टी, वांद्रे दरम्यान मेगाब्लॉक घेण्यात येणार आहे. मुख्य मार्गावर सकाळी ८ ते दुपारी दीड वाजेपर्यंत हा ब्लॉक असेल.

या कालावधीत अप आणि डाउन मार्गावरील मेल-एक्सप्रेस जलद मार्गावरून चालविण्यात येणार आहे. यामुळे मेल-एक्सप्रेस १० ते १५ मिनिट वेळाने धावणार आहेत. हार्बर मार्गावर सीएसएमटी ते चुनाभट्टी, बांद्रा दरम्यान सकाळी १०.१० ते दुपारी ४.४० वाजेपर्यत ब्लॉक असणार आहे. यादरम्यान सीएसएमटी ते चुनाभट्टी, वांद्रे, गोरेगाव दरम्यानची लोकल सेवा बंद राहणार आहे. हार्बर मार्गावरील प्रवाशांच्या सोयीसाठी कुर्ला ते पनवेल दरम्यान स्पेशल लोकल चालविण्यात येणार आहे.

कांजूरमार्ग स्थानकावर मध्यरात्री 'पॉवर ब्लॉक' घेण्यात येणार आहे. मध्य रेल्वेच्या कांजूरमार्ग स्थानकावर कल्याण दिशेकडील जुन्या पादचारी पुलाचे ट्रस गर्डर्स हटविणे व उतरविणे यासाठी ब्लॉक घेण्यात येणार आहे. शनिवारी रात्री १२ ते रविवारी पहाटे ५ वाजेपर्यंत अप व डाउन धिम्या, जलद तसेच ५ आणि ६ व्या मार्गावर घेण्यात येणार आहे.

या कालावधीत धिम्या गाड्या जलद मार्गावर वाळविण्यात येतील. नाहुर, कांजूरमार्ग व विद्याविहार स्थानकांवर थांबणार नाहीत.दरम्यान दिवाळीच्या कालावधीत अनेक नागरिक फिरण्याच्या निमित्ताने बाहेर पडतात. मात्र उद्या मेगा ब्लॉक असल्या कारणाने मोठ्या प्रमाणावर प्रवाशांची गैरसोय होऊ शकते. त्यामुळे मध्यरेल्वेने रेल्वेचे वेळापत्रक पाहूनच घराबाहेर पडा असे आवाहन केले आहे.