मध्य रेल्वेने ठाणे आणि डोंबिवली येथे घेतलेला १५-डब्यांच्या फलाटाच्या विस्तारासाठीचा मेगा ब्लॉक यशस्वीरित्या पूर्ण केला आहे. मध्य रेल्वेने तब्बल २१ मार्च रोजी १० तासांचा विशेष ब्लॉक घेतला होता. या ब्लॉकच्या कालावधित विविध कामे पूर्ण करण्यात आली. यामुळे भविष्यात डोंबिवलीपासून पुढे सीएसएमटीपर्यंतचा प्रवास जलद होणार आहे.

मध्य रेल्वेकडून ठाणे आणि डोंबिवली स्थानकांवरील प्लॅटफॉर्मचा विस्तार करण्याशी संबंधित कामांच्या अंमलबजावणीसाठी हा ब्लॉक घेण्यात आला होता. ठाणे रेल्वे स्टेशनचे प्लॅटफॉर्म क्र. १, २, ३ – छत्रपती शिवाजी महाराज टर्मिनस बाजू आणि डोंबिवली प्लॅटफॉर्म क्र. १ए, १ व २ येथे 'अप' आणि 'डाऊन' उपनगरीय मार्गांवर ब्लॉक घेण्यात आला.

डोंबिवलीत कोणती कामे हातात घेण्यात आली?

रेल्वे मार्ग आणि पायाभूत सुविधांमध्ये बदल करण्यात आलाय. यामध्ये 'पॉइंट क्र. १२५ डब्ल्यू' काढून टाकणे आणि तो पुन्हा बसवणे, ४-५ मीटरचे 'स्ल्यूइंग' करून नव्याने टाकलेल्या १५० मीटर लांबीच्या सरळ मार्गाशी जोडलेला नवीन '१२५ डब्ल्यू क्रॉसओव्हर' कार्यान्वित करणे अशा कामांचा समावेश होता.

या कामामध्ये ७ ओएचई मास्ट्स/पोर्टल्स पाडणे, 'डाऊन लोकल लाईन'च्या बाजूने केबलिंगचे स्थलांतर करणे, रुळांचे सरकवणे आणि प्लॅटफॉर्मच्या विस्तारासाठी जागा निर्माण करणे यांचाही समावेश होता. याव्यतिरिक्त, 'अप लोकल' मार्गावर किमी ४८/२०० आणि ४७/२०० च्या दरम्यान दोन डीएसएल लोकोमोटिव्हसह ११ बीआरएन वॅगन्सचा वापर करून १३-मीटर पॅनेल्स (१० नग) उतरवण्याचे आणि भंगार साहित्य हटवण्याचे काम पार पाडण्यात आलेत.

ठाण्यात कोणती कामे घेण्यात आली होती?

ठाणे स्टेशनजवळ 'डाऊन लोकल लाईन'वर प्रगती साधण्यात आली होती. यात 'हायड्रा', 'जेसीबी' आणि 'पोकलेन' यांसारख्या अवजड यंत्रसामग्रीचा वापर करून 'क्रॉसओव्हर क्र. १४८ए/बी' चे जुने भाग काढून टाकणे आणि सुमारे ६० मीटर अंतरावर त्याचे पुनर्स्थापन करणे या कामांचा समावेश आहे. याव्यतिरिक्त, 'पीसीटीएम-०२१' या यंत्राचा वापर करून 'टर्नआउट्स' आणि 'क्रॉसओव्हर्स'चे (पॉइंट क्र. १३५बी, १४६ ए, १४८ए आणि १४८बी) 'टॅम्पिंग' करण्यात आले. या कामामुळे 'टर्नआउट लॅडर क्र. १४९ए/बी' चे स्थलांतर करण्यासाठी तसेच प्लॅटफॉर्म क्र. ३ आणि ४ च्या पुढील विस्तारासाठी आवश्यक असलेली जागा उपलब्ध होण्यास मदत झालीये.