>> सिद्धेश म्हात्रे

नवी मुंबई : नवी मुंबईतील १२ जणांच्या टोळक्याने दोन जणांना बेदम मारहाण केल्याची घटना समोर आली आहे. एका हॉटेलमध्ये जेवत असताना किरकोळ कारणावरुन टोळक्याने दोघांना ही मारहाण केली आहे. गंभीर जखमी झालेल्या दोघांवर रुग्णालयात उपचार सुरु आहेत. मारहाणीचा हा सर्व प्रकार CCTV कॅमेऱ्यात कैद झाला आहे.

कोपरखैरणे येथील क्वालीटी ऑफ पंजाब हॉटेलमध्ये बुधवारी रात्री ही घटना घडली आहे. हॉटेलमध्ये जेवायला बसलेल्या दोघांसोबत त्याच हॉटेलमध्ये जेवायला बसलेल्या १० ते १२ जणांचा शुल्लक गोष्टीवरून वाद झाला. या वादाचे रूपांतर जोरदार हाणामारीत झाले. त्यानंतर १२ जणांनी मिळून दोघांना जबर मारहाण केली आहे. (Latest Marathi News)

मारहाण करताना टोळक्याने हातात मिळेत त्यांनी या दोघांना मारहाण केली. हॉटेलमधील खुर्च्या, जेवणाच्या प्लेट, बाटल्या यांच्या साह्याने मारत या दोघांना रक्तबंबाळ केलं. या मारहाणीत दोघेजण गंभीर जखमी झाले आहेत.

मारहाण करणाऱ्यांनी पीडितांच्या गळ्यातील चैन आणि मोबाईल देखील लंपास केले आहे. या प्रकरणी कोपरखैरणे पोलीस ठाण्यात गुन्हा दाखल करण्यात आला असून पोलीस सर्व १२ आरोपीचा शोध पोलीस घेत आहेत.