मुंबईचे माजी महापौर आणि शिवसेना उद्धव बाळासाहेब ठाकरे गटाचे नेते दत्ता दळवी यांच्यावर भांडुप पोलिसांत गुन्हा दाखल करण्यात आला आहे. मुख्यमंत्री एकनाथ शिंदे यांना जाहीर सभेतून शिवीगाळ केल्याचा आरोपाखाली हा गुन्हा दाखल करण्यात आला आहे. मुख्यमंत्र्यांवर आक्षेपार्ह वक्तव्य केल्याप्रकरणी ठाकरे गटाच्या नेत्यांवर दाखल झालेला हा दुसरा गुन्हा आहे. ('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)
यापूर्वी १८ नोव्हेंबर रोजी मुख्यमंत्री एकनाथ शिंदे (CM Eknath Shinde) यांच्याबद्दल सोशल मीडियावरून आक्षेपार्ह पोस्ट टाकल्याबद्दल ठाकरे गटाचे अंधेरीतील कार्यकर्ते हेमंत पालव यांच्याविरोधात गुन्हा दाखल करण्यात आला होता. शिंदे गटाच्या तक्रारीवरून अंधेरी पोलिसांनी हा गुन्हा दाखल केला होता.
शिवसेना उबाठा गटातर्फे रविवारी (२७ नोव्हेंबर) भांडुपमधील ईशान्य मुंबईत राहणाऱ्या कोकणवासियांचा जाहिर मेळावा आयोजित केला होता. या मेळाव्यात मुख्यमंत्री एकनाथ शिंदे यांच्या नावापुढे राजस्थान प्रचारावेळी लावण्यात आलेल्या 'हिंदुह्रदयसम्राट' या उपमेवरून माजी महापौर दत्ता दळवी (Shiv sena Datta Dalvi) यांनी जोरदार टीका केली.
यावरून शिंदे गटाचे नेते तसेच कार्यकर्ते आक्रमक झाले. दत्ता दळवी यांनी जाहीर सभेतून मुख्यमंत्री एकनाथ शिंदे यांना शिवीगाळ केली. संविधानिक पदावर बसलेल्या व्यक्तीबद्दल अपमानकारक वक्तव्य केलं, असा आरोप करत शिंदे गटाने पोलिसांत तक्रार दाखल केली.
त्यानुसार भांडुप पोलिसांनी माजी महापौर दत्ता दळवी यांच्या विरोधात भादवी कलम १५३(अ),१५३ (ब),१५३(अ)(१)सी, २९४, ५०४,५०५(१)(क) अंतर्गत गुन्हा दाखल करण्यात आला आहे. या प्रकरणाता अधिक तपास पोलीस करीत आहेत.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.