सूरज सावंत, मुंबई प्रतिनिधी | ०७ डिसेंबर, २०२३

Aditya Thackeray Latest News

राज्याच्या राजकीय वर्तुळातून एक मोठी बातमी समोर येते आहे. शिवसेना उद्धव बाळासाहेब ठाकरे गटाचे आमदार आदित्य ठाकरे यांच्या अडचणीत वाढ होण्याची शक्यता आहे. कारण, दिशा सालियान मृत्यू प्रकरणात राज्य सरकारकडून आदित्य ठाकरे यांची एसआयटी चौकशी केली जाणार आहे, साम टीव्हीला खात्रीलायक सूत्रांनी ही माहिती दिली आहे.  ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

अभिनेता सुशांतसिंह राजपूत याची मॅनेजर दिशा सालियान हिचा ८ जून २०२० ला रोजी मृत्यू झाला होता. पोलिसांच्या (Police) माहितीनुसार दिशाने आत्महत्या केली होती. पण, तिची हत्या झाली असा संशय व्यक्त करत आरोप करण्यात आला होता.

दिशाच्या मृत्युनंतर जवळपास ६ दिवसांनी अभिनेता सुशांतसिंह राजपूत हा आपल्या घरात मृतावस्थेत आढळून आला होता.यामुळे दिशाच्या मृत्यू प्रकरणी केंद्रीय मंत्री नारायण राणे यांचे पुत्र आणि भाजप आमदार नितेश राणे यांनी एसआयटी चौकशीची मागणी केली.

शिवसेना नेते आदित्य ठाकरे (Aaditya Thackeray) यांची नार्को टेस्ट करा, अशी मागणी देखील नितेश राणे यांनी केली. त्यावर राज्याचे गृहमंत्री देवेंद्र फडणवीस यांनी मागच्या नागपूरच्या हिवाळी अधिवेशनात याप्रकरणी SIT चौकशीचे आदेश दिले होते.

दिशा सालियानच्या मृत्यू प्रकरणी नेमके आदीत्य ठाकरे त्या वेळी होते कुठे ? असा प्रश्न उपस्थित करण्यात आला होता. आता राज्य सरकार दिशा सालियान प्रकरणात आदित्य ठाकरे यांची एसआयटी चौकशी करणार आहे. अतिरिक्त पोलिस आयुक्तांच्या नेतृत्वात हे SIT पथक काम करणार आहे. चौकशीत अनेक पुरावे समोर येणार असल्याची माहिती सूत्रांनी दिली आहे.