पती-पत्नीमध्ये होणाऱ्या वादातून बोललेले एखादे वाक्य म्हणजे आत्महत्येस प्रवृत्त करणे असे म्हणता येणार नाही, असे महत्त्वाचे निरीक्षण हाय कोर्टाने नोंदवले आहे. पत्नीच्या आत्महत्येप्रकरणी आरोपी असलेल्या पतीला न्यायालयाने जामीन मंजूर केला आहे.

मिळालेल्या माहितीनुसार, संबंधित जोडप्याचं लग्न २०२५ मध्ये झाला होता. दोघांमध्ये काही कारणांवरून वारंवार वाद होत असल्याचे समोर आले. एके दिवशी पती-पत्नीमध्ये जोरदार भांडण झाले. यावेळी पत्नीने पतीला, 'तू माझे ऐकले नाहीस तर मी माझे आयुष्य संपवेन', अशी धमकी दिली होती. त्यावर पतीने 'तुला काय करायचे ते कर' असे उत्तर दिले. त्यानंतर तो घराबाहेर निघून गेला. काही वेळानंतर पत्नीने आत्महत्या केल्याची घटना घडली. या प्रकरणानंतर पतीविरोधात पत्नीला आत्महत्येस प्रवृत्त केल्याचा गुन्हा दाखल करण्यात आला होता.

या प्रकरणात पतीने जामिनासाठी मुंबई उच्च न्यायालयात याचिका दाखल केली होती. न्यायमूर्ती मिलिंद जाधव यांच्या एकलपीठासमोर या याचिकेवर सुनावणी झाली. सुनावणीदरम्यान न्यायालयाने पती-पत्नीमधील वाद आणि उपलब्ध परिस्थितीचा विचार केला. पती नोकरीच्या कामामुळे पत्नीला पुरेसा वेळ देऊ शकत नसेल किंवा तिला बाहेर फिरायला घेऊन जात नसेल, तर केवळ या कारणांमुळे त्याला क्रूर वागणूक दिल्याचा दोष देता येणार नाही, असे न्यायालयाने स्पष्ट केले.

तसेच, भांडणाच्या वेळी पतीने बोललेल्या एका वाक्यावरून त्याने पत्नीला आत्महत्या करण्यास प्रवृत्त केले, असा निष्कर्ष काढणे योग्य ठरणार नाही, असेही न्यायालयाने नमूद केले. या निरीक्षणांच्या आधारे उच्च न्यायालयाने आरोपी पतीला जामीन मंजूर केला. या निर्णयामुळे वैवाहिक वाद आणि आत्महत्येस प्रवृत्त करण्याच्या आरोपांबाबत न्यायालयाने महत्त्वाची भूमिका स्पष्ट केली आहे.