मुंबई महापालिकेत गेल्या अनेक वर्षांपासून मलईदार खात्यांत ठाण मांडून बसलेल्या शेकडो अभियंत्यांची आता उचलबांगडी होणार आहे. पालिकेत एकूण साडेतीन हजार अभियंते कार्यरत असून, त्यापैकी सुमारे ८०० अभियंते गेली १० ते १७ वर्षे एकाच विभागात खुर्च्या उबवत आहेत. मलईदार खात्यांमध्ये ठाण मांडून बसलेल्या या अधिकाऱ्यांना चाप लावण्यासाठी पालिका प्रशासनाने ऑनलाईन बदलीचा मास्टरप्लॅन आखलाय. पण ही बदली प्रक्रिया नेमकी कशी असणार आहे,

800 अभियंत्यांची होणार बदली

संगणकीय प्रणालीद्वारे पारदर्शक बदल्या

5 प्राधान्यक्रम निवडण्याची सुविधा

1 ते 15 ऑक्टोबरदरम्यान अधिकृत आदेश

दरवर्षी 25 टक्के बदल्यांचा नियम लागू

एकाच विभागात ३ वर्षांपेक्षा जास्त काळ काम करणाऱ्या अभियंत्यांची बदली होणारेय. सॉफ्टवेअरमध्ये सर्व डेटा फीड केल्याने आता कोणताच राजकीय वशिला चालणार नाही. पात्र अभियंत्यांनी ५ ते २० सप्टेंबर दरम्यान ऑनलाईन अर्ज करून ५ पसंतीक्रम नोंदवलेत, छाननी प्रक्रिया पूर्ण करून १ ऑक्टोबरपासून टप्प्याटप्प्याने बदली आदेश जारी होणारेत. दरवर्षी नियमानुसार २५ टक्के कर्मचाऱ्यांच्या बदल्या अनिवार्य करण्यात आल्यायेत.

अनेक वर्षांपासून काही ठराविक विभागांमध्येच पोस्टिंग मिळवण्यासाठी अर्थपूर्ण व्यवहारातून वशिलेबाजी केली जायची. पण पालिकेच्या या ऑनलाईन आणि पारदर्शक भूमिकेमुळे भ्रष्ट संस्कृतीला मोठा पायबंद बसणार आहे. नुकतेच उसनवारीवर आलेल्या पाचशेहून अधिक अधिकाऱ्यांना मंत्रालयातून माघारी पाठवण्यात आल्यानं आता बीएमसीमध्ये देखिल सिंडिकेट मोडून काढण्यासाठी हालचाली सुरू झाल्या आहेत. मात्र प्रत्यक्षात याची अंमलबजावणी होणार की पुन्हा सेटिंग करून ठाण मांडणार याकडे लक्ष लागलंय.