मुंबई : 'काँग्रेस नेते राहुल गांधी (Rahul Gandhi) यांनी काढलेली यात्रा ही भारत जोडो यात्रा नाही, तर मोदी हटाओ यात्रा आहे', असं म्हणत उपमुख्यमंत्री देवेंद्र फडणवीस यांनी भारत जोडो यात्रेवर टीका केली आहे. 'विरोधक कितीही एकत्र आलेत. तरी पंतप्रधान नरेंद्र मोदी हटणार नाही. कारण मोदी हे लोकांच्या मनामध्ये बसलेले आहे', असंही देवेंद्र फडणवीस म्हणाले.

राज्याचे उपमुख्यमंत्री तथा भाजपा नेते देवेंद्र फडणवीस (Devendra Fadnavis) यांनी मुंबईत पत्रकारांशी संवाद साधला यावेळी ते बोलत होते. देशातील तसेच महाराष्ट्रातील शिंदे-भाजप सरकारचं वातावरण पाहता अनेक पक्षांना ही भीती वाटायला लागली आहे की, कदाचित आपले आमदार आपल्या पक्षात टिकणार नाही त्यामुळे त्यांना निवडणुकीची भीती दाखवली जात आहे, असा टोलाही देवेंद्र फडणवीस यांनी उद्धव ठाकरे यांचं नाव घेता लगावला आहे.

भारत जोडो यात्रेचा महाराष्ट्रावर काहीही परिणाम होणार नाही. यात्रा सुखरूपपणे महाराष्ट्राच्या बाहेर जाईल अशी आम्ही व्यवस्था करू, जे काही कार्यक्रम भारत जोडो यात्रेदरम्यान, घेतले जाईल ते कायदेशीरित्या योग्य पार पडण्यासाठी आम्ही प्रयत्न करू असंही देवेंद्र फडणवीस म्हणाले आहेत.

राहुल गांधी यांच्या नेतृत्वात सुरू असलेली काँग्रेसची भारत जोडो यात्रा आज महाराष्ट्रात दाखल होत आहे. संध्याकाळी साडेसात वाजता राहुल गांधी मशाल घेऊन नांदेडमध्ये येणार आहे. भारत जोडो यात्रेचा 14 दिवस महाराष्ट्रात मुक्काम असेल. काँग्रेस नेते अशोक चव्हाण, नाना पटोले आणि बाळासाहेब थोरात यांनी पत्रकार परिषद घेत भारत जोडो यात्रेबद्दल माहिती दिली. भारत जोडो या यात्रेची महाराष्ट्रातील जबाबदारी अशोक चव्हाण यांच्याकडे आहे.

Edited By - Satish Daud