शिवसेनेच्या खासदार भावना गवळी यांना ईडने पुन्हा एकदा समन्स बजावले आहे. ईडने गवळी यांना आज चौकशीसाठी बोलवले आहे. भावना गवळी यांच्यावर बालाजी पार्टिकल बोर्ड कारखान्यात १०० कोटींचा घोटाळा झाल्याचा आरोप आहे. या प्रकरणात ईडीने गवळी यांच्याशी संबंधित असलेल्या यवतमाळ व वाशिम येथील पाच संस्थांवर याआधीच छापे टाकले आहेत. वाशिम-यवतमाळ येथे टाकलेल्या छाप्यांमध्ये ईडीने अनेक कागदपत्रे जप्त केली होती.

हे देखील पहा -

भावना गवळी यांच्याशी संबंधित पाच संस्थांच्या अधिकाऱ्यांची देखील चौकशी करण्यात आली होती. त्याशिवाय, गवळी यांच्या महिला उत्कर्ष प्रतिष्ठान या संस्थेच्या कार्यालयातून ७ कोटी रुपये चोरीला गेल्याची तक्रार खुद्द भावना गवळी यांनी केली होती. गवळी यांच्या तक्रारीनंतर भाजपचे माजी खासदार किरीट सोमय्या यांनी यांच्याविरोधात आरोपांची राळ उडवून दिली होती. तेव्हापासून ईडीच्या कारवाईला वेग आला आहे.

गवळी यांचा निकटवर्तीय सईद खान याला अलीकडेच ईडीने ताब्यात घेतले आहे. त्यानंतर आता ईडीने गवळी यांना समन्स बजावले आहे. यापूर्वी गवळी यांना ४ ऑक्टोबर रोजी ईडीने समन्स बजावले आले होते. त्यावेळी गवळी यांनी १५ दिवसांची मुदत मागितली होती. ही मुदत संपली असल्याने ईडीने दुसऱ्यांदा गवळी यांना समन्स पाठवले आहे. या समन्सला भावना गवळी कसा प्रतिसाद देतात, याकडे आता लक्ष लागलेले आहे.

Edited By - Shivani Tichkule