Mumbai Best Bus Ticket Now Available Digital App मुंबईच्या बेस्ट बसमधून प्रवास करताना कंडक्टरकडे तिकीट मागण्याची तसेच सुट्ट्या पैशांची कटकट आता संपली आहे. कारण बेस्ट आता बसची तिकिटे ऑनलाईन उपलब्ध करणार आहे. प्रवासी आता ओपन नेटवर्क फॉर डिजिटल कॉमर्सच्या (ONDC) माध्यमातून सहजपणे बसची तिकिटे खरेदी करू शकणार आहेत. या नवीन सुविधेमुळे प्रवाशांना क्यूआर कोड स्कॅन करून थेट त्यांच्या मोबाईल ॲपवरून तिकिटे खरेदी करता येतील. शहरातील सार्वजनिक वाहतुकीचे आधुनिकीकरण करण्याच्या दिशेने एक मोठे पाऊल मानले जात आहे.

अधिकृत माहितीनुसार, बेस्टची डिजिटल तिकिटे खरेदी करण्यासाठी नवीन ॲप डाउनलोड करण्याची गरज भासणार नाही. प्रवासी गूगल पे, फोनपे, पेटीएम आणि व्हॉट्सॲप यांसारख्या लोकप्रिय ॲप्सचा वापर करू शकतील. सध्या, बेस्टच्या एकूण महसुलापैकी अंदाजे १५-१६% वाटा डिजिटल तिकीट प्रणालीचा आहे. ओएनडीसीसोबतच्या एकीकरणानंतर हा आकडा २५-३०% पर्यंत वाढण्याची अपेक्षा आहे.

मुंबईत मोठ्या प्रमाणावर डिझेल बेस्ट बसेस बंद करण्यात आल्या असून इलेक्ट्रिक बसेस सुरू करण्यात आल्या आहेत, ज्यात अनेक इलेक्ट्रिक डबल-डेकर बसेसचाही समावेश आहे. अधिकाऱ्यांच्या म्हणण्यानुसार, गूगल पे, व्हॉट्सॲप यांसारख्या नेहमीच्या वापरातील ॲप्सद्वारे तिकिटे खरेदी करणे प्रवाशांसाठी सोयीस्कर ठरेल. तसेच सुट्ट्या पैशांसाठी होणारे वाद संपतील.

या उपक्रमाचा एक मोठा फायदा असा आहे की, भविष्यात बस, मेट्रो आणि रेल्वे यांसारख्या सेवा प्रवाशांना एकाच प्लॅटफॉर्मवर उपलब्ध होतील. मुंबईच्या सार्वजनिक वाहतुकीने अधिक स्मार्ट, कनेक्टेड बनण्याच्या दिशेने एक महत्त्वाचे पाऊल मानले जाते.