बदलापूरमध्ये एक अत्यंत दुर्दैवी आणि मन हेलावून टाकणारी घटना समोर आली आहे. एका फळविक्रेत्या महिलेच्या एकुलत्या एका मुलाने गुरुवारी रेल्वेखाली उडी घेऊन आपली जीवनयात्रा संपवली. प्रेमप्रकरणातील वादानंतर या तरुणाने हे टोकाचे पाऊल उचलल्याची प्राथमिक माहिती समोर येत आहे. मिळालेल्या माहितीनुसार, विशाल दाते असे या आत्महत्या केलेल्या 24 वर्षीय तरुणाचे नाव आहे. विशालची आई बदलापुरातील नवरत्न हॉटेल परिसरात फलविक्री करून कुटुंबाचा गाडा चालवते. गुरुवारी दुपारी विशालचा फोनवर कुणाशी तरी जोरदार वाद झाला होता. या वादानंतर तो प्रचंड रागाच्या भरात घरातून निघून गेला.

मुलाचा राग आणि तो अचानक निघून गेल्याने काळजीपोटी कुटुंबीयांनी त्याचा शोध सुरू केला. मात्र काही वेळातच विशालने रेल्वेखाली उडी घेऊन आत्महत्या केल्याची धक्कादायक बातमी समोर आली. विशालच्या वडिलांचे यापूर्वीच निधन झाले असून, तो त्याच्या आईचा एकमेव आधार होता. एकुलत्या एक मुलाचा आधार हरपल्याने महिलेवर मोठा दु:खाचा डोंगर कोसळला असून संपूर्ण परिसरात हळहळ व्यक्त केली जात आहे.

पोलीस या प्रकरणी पुढील तपास करत असून आत्महत्या करण्यापूर्वी फोनवर कोणाशी वाद झाला होता, याचा शोध घेतला जात आहे.