बदलापूर शहरातील वर्षानुवर्षे प्रलंबित असलेल्या रिंगरोडच्या मार्गातील अडथळा अखेर दूर झाला आहे. बदलापूर नगरपरिषदेच्या अतिक्रमण विभागाने माणकिवली परिसरात धडक मोहीम राबवत ६० ते ६५ अनधिकृत बांधकामांवर तोडक कारवाई केली. चार जेसीबीच्या साह्याने ही कारवाई करण्यात आली असून, यामुळे पनवेल हायवे आता थेट माणकिवली मार्गे कल्याण-कर्जत राज्य महामार्गाला जोडण्याचा मार्ग मोकळा झाला आहे.

वाहतूक कोंडीतून होणार सुटका

बदलापुरातील कात्रप भागात राज्य महामार्गावर सातत्याने होणाऱ्या वाहतूक कोंडीवर तोडगा म्हणून पनवेल हायवे माणकिवली मार्गे खरवईजवळ कल्याण-कर्जत हायवेला आणि दहिवलीमार्गे जेएनपीटी हायवेला जोडण्याची मागणी गेल्या अनेक वर्षांपासून होत होती. मात्र, अवघ्या २०० मीटरच्या मार्गात मोठ्या प्रमाणावर अतिक्रमणे असल्याने रिंगरोडचा प्रश्न रखडला होता.

अखेर नगरपरिषदेचे मुख्याधिकारी मारुती गायकवाड यांच्या मार्गदर्शनाखाली अतिक्रमण विभागाने ही धडक कारवाई केली. या मोहिमेत चार ते पाच चाळी आणि सहा व्यावसायिक गाळ्यांसह अनेक अडथळे भुईसपाट करण्यात आले. येत्या दोन दिवसांत उर्वरित अनधिकृत बांधकामांवरही कारवाई केली जाणार आहे.

दोन ते तीन महिन्यांत काम पूर्ण होणार

मॅकडी चौक ते खरवई दरम्यानच्या रिंगरोडचे काम प्रलंबित होते. हा रस्ता पूर्ण झाल्यास शहरातील ट्रॅफिकचे नियोजन अत्यंत प्रभावीपणे होईल. आज ६० ते ६५ अतिक्रमणांवर कारवाई झाली असून पुढील दोन दिवसांत २०० मीटर रस्त्यामधील सर्व अनधिकृत बांधकामे हटवली जातील.

५ ते ६ जुन्या घरांच्या पुनर्वसनाचा प्रश्न मार्गी लावल्यानंतर येत्या दोन ते तीन महिन्यांत हा रस्ता वाहतुकीसाठी सज्ज होईल. या कारवाईमुळे बदलापूरकरांना वाहतूक कोंडीतून मोठा दिलासा मिळणार असून, येत्या काही महिन्यांत शहराच्या मोठी सुधारणा पाहायला मिळेल. असा विश्वास मुख्याधिकारी गायकवाड यांनी व्यक्त केलाय.