संघर्ष गांगुर्डे, साम टीव्ही

कल्याणमध्ये पुन्हा एकदा गुन्हेगारी डोकं वर काढू लागली आहे. सोनसाखळी चोर, अल्पवयीन तळीरामांनी उच्छाद मांडला आहे. आता यात वेश्या व्यवसाय करणाऱ्या महिलांची भर पडली आहे. वेश्या व्यवसाय करणाऱ्या महिलांनी स्कायवॉकवर एका व्यक्तीला मारहाण केल्याची घटना घडली आहे. या व्यक्तीला मारहाण करतानाचा व्हिडिओ सोशल मीडियावर व्हायरल झाला आहे. या घटनेमुळे नागरिकांमध्ये मोठी चर्चा रंगली आहे.

मिळालेल्या माहितीनुसार, कल्याण स्कायवॉक परिसरात काही वेश्या व्यवसाय करणाऱ्या महिला नियमितपणे वावरत असल्याची तक्रार स्थानिक नागरिकांनी यापूर्वीही केली होती. संबंधित व्यक्ती आणि वेश्या व्यवसाय करणाऱ्या महिलांमध्ये नेमका कोणत्या कारणावरून वाद झाला हे अद्याप स्पष्ट झालेले नाही. मात्र या व्यक्तीला मारहाण करतानाचा व्हिडिओ काही प्रवाशांनी मोबाईलमध्ये टिपून सोशल मीडियावर शेअर केला.

व्हिडिओमध्ये वेश्या व्यवसाय करणाऱ्या महिला त्या व्यक्तीला कानशीलात लगावत असल्याचे स्पष्ट दिसत आहे. या प्रकरणाचा तपास कल्याण रेल्वे पोलीस ठाण्यांकडून सुरू करण्यात आला आहे. या घटनेमुळे पुन्हा एकदा स्कायवॉकवरील असुरक्षिततेचा मुद्दा समोर आला आहे.

कल्याणमध्ये कोयता गँगचा उच्छाद

कल्याणमध्ये शनिवारी रात्री मद्यधुंद अवस्थेत दोन तरुणांनी हातात कोयता घेऊन धिंगाणा घातल्याची धक्कादायक घटना घडली. टपरी चालकाने सिगारेट ओढण्यासाठी माचिस देण्यास नकार दिला. त्यानंतर संतापलेल्या दोघांनी कोयता दाखवून परिसरात दहशत माजविण्याचा प्रयत्न केला. या घटनेमुळे नागरिकांमध्ये भीतीचं वातावरण निर्माण झालं होतं. या घटनेचा व्हिडिओ सोशल मीडियावर झाला आहे.