सुशांत सावंत, मुंबई

मुंबई: मशीदींवरील भोंग्याच्या मुद्दयावरून सपाचे आमदार अबू आझमी यांनी मनसे अध्यक्ष राज ठाकरे यांच्यावर जहरी टीका केली आहे. राज ठाकरेंना (Raj Thackeray) अटक करुन तुरुंगात टाका अशी मागणी समाजवादी पक्षाचे आमदार अबू आझमींनी (Abu Azmi) केली आहे. आमदार अबू आझमी यांनी आज शरद पवारांची (Sharad Pawar) भेट घेतली, यावेळी त्यांनी ही मागणी केली आहे. (Arrest Raj Thackeray and send him to jail: Demand of SP MLA Abu Azmi)

हे देखील पहा -

अबू आझमी म्हणाले की, राज ठाकरेंसारखे लोक ज्यांंची काही लायकी नाही, ज्यांच्याकडे सीट नाही असे लोक आपली मनमानी करतात. मशीदींना परवानगी मिळाली आहे. या देशाच्या कायद्यानुसार हिंदु बांधव मंदिरात पूजा करु शकतात, मुस्लिम बांधव नमाज पठण करु शकतात असा कायदा देशात असताना राज ठाकरे काहीही बोलतात. त्यामुळे राज ठाकरेंसारख्या लोकांच्या हातात बेड्या ठोकून त्यांना जेलमध्ये टाकावे असं अबू आझमी म्हणाले आहेत.

मशिदीवरील भोंग्याबाबत काय म्हणाले होते राज ठाकरे?

२ एप्रिलला गुढीपाडव्याच्या सभेत राज ठाकरे म्हणाले होते की, मशिदीवरचे भोंगे खाली उतरवावे लागतील, मी धर्मांध नसून धर्माभिमानी असल्याचे म्हणत राज ठाकरेंनी मशिदीवरील भोंग्यावर पुन्हा एकदा प्रश्नचिन्ह उपस्थित केला. जर सरकारने मशिदीवरील भोंगे उतरवण्याचे काम केले नाही तर आम्ही त्या मशिदींसमोर मोठमोठे स्पीकर लावून हनुमान चालीसा लावू असे राज ठाकरे म्हणाले.

Edited By - Akshay Baisane