संजय गडदे, मुंबई प्रतिनिधी

Anil Ambani bank loan fraud investigation details : ४० हजार कोटी रुपयांच्या कथित बँक घोटाळा आणि मनी लॉन्ड्रिंग प्रकरणात उद्योगपती अनिल अंबानी यांना अंमलबजावणी संचालनालयाने (ईडी) पुन्हा एकदा समन्स बजावले आहेत. या प्रकरणात चौकशीसाठी २६ फेब्रुवारी रोजी दिल्ली येथील ईडी कार्यालयात हजर राहण्याचे निर्देश त्यांना देण्यात आले आहेत. (ED investigation process)

सूत्रांच्या माहितीनुसार, यापूर्वीही अनिल अंबानी यांना चौकशीसाठी समन्स पाठवण्यात आले होते. मात्र, ते निर्धारित दिवशी हजर राहिले नसल्याने ईडीने नव्याने समन्स जारी केले आहेत. या पार्श्वभूमीवर २६ फेब्रुवारीची चौकशी महत्त्वाची मानली जात आहे.

हे प्रकरण सुमारे ४० हजार कोटी रुपयांच्या कथित बँक कर्ज घोटाळ्याशी संबंधित असल्याचे सांगितले जात आहे. विविध बँकांकडून घेतलेल्या कर्जाच्या वापराबाबत आणि निधीच्या कथित वळवणुकीबाबत तपास सुरू आहे. या आर्थिक व्यवहारांतून मनी लॉन्ड्रिंग झाल्याचा संशय व्यक्त करण्यात आला असून, त्या अनुषंगाने ईडीने मनी लॉन्ड्रिंग प्रतिबंधक कायद्यान्वये (PMLA) चौकशी सुरू केली आहे.

ईडीकडून संबंधित कागदपत्रे, आर्थिक देवाणघेवाण, कंपन्यांचे व्यवहार, तसेच कर्ज वितरण आणि परतफेडीच्या तपशिलांची छाननी केली जात आहे. आवश्यक असल्यास संबंधित अधिकारी आणि बँक प्रतिनिधींचीही चौकशी होण्याची शक्यता वर्तवली जात आहे. दरम्यान, या प्रकरणामुळे उद्योग क्षेत्रात खळबळ उडाली असून, २६ फेब्रुवारी रोजी अनिल अंबानी ईडीसमोर हजर राहतात का, याकडे सर्वांचे लक्ष लागले आहे. पुढील तपासानुसार अधिक माहिती समोर येण्याची शक्यता आहे.