अजय दुधाणे - उल्हासनगर

Ambernath Police Fake Rudra Tech Call Centre Busted Crime News बदलापूरनंतर अंबरनाथमध्ये पोलिसांनी मोठी कारवाई करत एका बनावट कॉल सेंटरचा पर्दाफाश केला आहे. या कॉल सेंटरमधून सॉफ्टवेअर विकण्याच्या नावाखाली अमेरिकन नागरिकांना गंडा घातला जात होता. यातून आत्तापर्यंत हजारो अमेरिकन नागरिकांकडून कोट्यवधी रुपये लुबाडण्यात आल्याची शक्यता पोलिसांनी वर्तवली आहे. याप्रकरणी पोलिसांनी ५ जणांना ताब्यात घेतले आहे.

मिळालेल्या माहितीनुसार, रुद्र टेक आयटी सर्व्हिस असं या बनावट कॉल सेंटरचं नाव आहे. अंबरनाथ पश्चिमेच्या ग्लोब बिझनेस सेंटरमध्ये तिसऱ्या माळ्यावर हे कॉल सेंटर सुरू होतं. या कॉल सेंटरमध्ये काम करणाऱ्या कर्मचाऱ्यांना दिवसाला अमेरिकन नागरिकांना लुटण्याचं टार्गेट ठरवून दिलं जात होतं.

त्यानुसार हे कर्मचारी अमेरिकन नागरिकांना कॉल करून वेबसाईट डेव्हलपमेंट आणि सॉफ्टवेअर विकण्याच्या नावाखाली संपर्क साधायचे आणि त्यांच्याकडून १०० ते २०० डॉलर ऍडव्हान्स मागवायचे. हे पैसे ते बिट कॉईन अकाऊंटमध्ये जमा करायचे. तसेच एकदा पैसे आले, की त्या अमेरिकन नागरिकाला ब्लॉक केलं जायचं. याबाबतची माहिती मिळताच अंबरनाथ पश्चिम पोलिसांनी मंगळवारी रात्री आठ वाजताच्या सुमारास या कॉल सेंटरवर धाड टाकली.

ही कारवाई बुधवारी सकाळी ७ वाजेपर्यंत सकाळपर्यंत सुरू होती. या कारवाईत पोलिसांनी कॉल सेंटरमधले लॅपटॉप, कॉम्प्युटर, मोबाईल फोन्स जप्त केले आहेत. तसंच अमेरिकन नागरिकांना गंडा घालणारा कॉल सेंटरचा मालक कमलेश सचवानी याच्यासह एकूण ५ जणांना बेड्या ठोकल्याची माहिती वरिष्ठ पोलीस निरीक्षक शब्बीर सय्यद यांनी दिली आहे.