अंबरनाथमध्ये कौटुंबिक वादातून पतीने पत्नीची हत्या केल्याचा प्रकार घडला होता. याप्रकरणी पोलिसांनी ८ दिवसांत मार्ग काढत अखेर वाराणसीहून आरोपी पतीला बेड्या ठोकल्या आहेत. मुलीचा नीट सांभाळ करत नसल्याने पत्नीशी वाद होऊन त्यातूनच पतीने पत्नीची हत्या केल्याचा उलगडा यानंतर झाला आहे.

मिळालेल्या माहितीनुसार, अंबरनाथच्या पालेगाव परिसरातील पार्श्व हिल्स सोसायटीत विकी लोंढे आणि त्याची पत्नी रूपाली लोंढे हे एक वर्षाच्या मुलीसह वास्तव्याला होते. रूपाली ही मुलीचा सांभाळ नीट करत नसल्यामुळे विकी याचे तिच्याशी नेहमीच वाद होत होते.

त्यातच ८ ऑक्टोबर रोजी सायंकाळी त्यांच्यात पुन्हा वाद होऊन विकीने रूपालीचा पट्ट्याने गळा आवळला आणि धारदार चाकूने तिचा गळा चिरून तिची हत्या केली. यानंतर विकी हा थेट उत्तर प्रदेशात पळून गेला. त्याचा मार्ग काढत असतानाच तो उत्तर प्रदेशात असल्याची माहिती पोलिसांना मिळाली.

त्यानुसार शिवाजीनगर पोलीस ठाण्याचे पोलीस उपनिरीक्षक सिराज शेख, भागवत सौंदाणे, कैलास पादीर हे तिघे तातडीने वाराणसीला रवाना झाले. तिथे स्थानिकांच्या वेशभूषेत सापळा रचून या तिघांनी विकीवर झडप घालत त्याला ताब्यात घेतलं.

तिथून त्याला शिवाजीनगर पोलीस ठाण्यात आणून गुरुवारी अटक करण्यात आली असून त्याला न्यायालयात हजर केलं जाणार असल्याची माहिती पोलीस उपायुक्त सचिन गोरे यांनी पत्रकार परिषदेत दिली. यावेळी सहाय्यक पोलीस आयुक्त सुरेश वराडे, वरिष्ठ पोलीस निरीक्षक रमेश पाटील हे देखील उपस्थित होते.