अंबरनाथ, ता. २५ जुलै २०२४

आज मध्यरात्रीपासून राज्यभरात पावसाने धुमाकूळ घातला असून अनेक जिल्ह्यातील शाळा- महाविद्यालयांना सुट्ट्या देण्यात आल्या आहेत. मुंबई, ठाणे, कल्याणसह पुण्यामध्ये पावसाचा धुमाकूळ पाहायला मिळत आहे. अंबरनाथ शहरातही पावसाचा जोर वाढला असून प्राचीन शिवमंदिराच्या गाभाऱ्यात पाणी शिरलं आहे.

अंबरनाथमध्ये सकाळपासून पावसाने धुमाकूळ घातला आहे. या पावसामुळे अनेक सखल भागात पाणी साचण्यास सुूरूवात झाली असून वालधुनी नदीला पूर आला आहे. तसोच शहरातील प्राचीन शिवमंदिराच्या गाभाऱ्यात पाणी शिरले आहे. मंदिराच्या गाभाऱ्यामध्ये गुडखाभर पाणी साचले असून गाभारा भाविकांसाठी बंद करण्यात आला आहे.

दरवर्षी नदीला पाणी वाढल्यानंतर अशाप्रकारे गाभाऱ्यात पाणी शिरुन भोलेनाथाला जलाभिषेक घातला जातो. गाभाऱ्यातील भोलेनाथाचा मुखवटा बाहेर काढून ठेवण्यात आला आहे. या मुखवट्याचं दर्शन आणि पूजा सध्या भाविक करत आहेत. पाणी कमी होईपर्यंत कुणालाही गाभाऱ्यात प्रवेश दिला जाणार नाही, असे मंदिर प्रशासनाने सांगितले आहे.

दरम्यान, उल्हास नदीने धोक्याची पातळी ओलांडल्याने बदलापूर मधील सखल भागात जमा होऊ लागल्या असून, बदलापूर मधील हेंद्रे पाडा येथे असलेल्या कृष्णा इस्टेट परिसरात गुडघाभर पाणी जमा झाले असून,तेथील लोकांना एक ते दीड फूट पाण्यातून जावे लागत आहे.

ठाणे, रायगड आणि पुणे जिल्ह्यात मागील २४ तासांपासून कोसळत असलेल्या मुसळधार पावसामुळे उल्हास नदीचा प्रवाह मोठ्या प्रमाणात वाढला आहे. त्यामुळे नदीचं पाणी रस्त्यावर येऊन बदलापूरहून कर्जतकडे जाणारा राज्य महामार्ग बंद झाला आहे.