Ajit Pawar : शिवसेनेत पडलेल्या फुटीबाबत राज्याचे विरोधी पक्षनेते अजित पवार यांनी मोठा गौप्यस्फोट केला आहे. एकनाथ शिंदे बंडाच्या तयारीत आहेत, याची पूर्वकल्पना उद्धव ठाकरे यांना आधीच दिली होती, असं अजित पवारांनी म्हटलं आहे. शरद पवार यांनीही उद्धव ठाकरेंना सावध केलं होतं. यासाठी पवार साहेबांनी त्यांना फोनही केला होता, असं अजित पवारांनी सांगितलं.

अजित पवार पुढे म्हणाले की, शरद पवार यांनी या मुद्द्यावर बैठकही घेतली होती. उद्धव ठाकरे यांना देखील सावध करण्यात आलं. मात्र माझा आमदारांवर पूर्ण विश्वास आहे. पक्षांतर्गत मुद्दा आहे सर्वांशी चर्चा करेन, असं त्यांनी सांगितलं.

मात्र उद्धव ठाकरेंचा हाच विश्वास त्यांच्यासाठी घातक ठरला. उद्धव ठाकरेंनी त्यांच्या आमदारांशीही चर्चा केली होती. ते त्यांच्या परीने काम करत होते. दुर्दैवाने त्यांना यश आलं नाही. कदाचित त्यांना कधी वाटलं नसेल की इतकी टोकाची भूमिका त्यांची सहकारी घेतील, असं अजित पवार म्हणाले.