Ravindra Waikar News:

गेल्या दीड वर्षात उद्धव ठाकरे यांना मुख्यमंत्री एकनाथ शिंदे यांनी एकामागून एक धक्के दिले आहेत. यातच आज उद्धव ठाकरे यांच्या अत्यंत जवळचे मानले जाणारे आमदार रवींद्र वायकर यांनी ठाकरेंची साथ सोडत शिवसेना शिंदे गटात प्रवेश केला आहे. वायकर यांच्या शिंदे गटातील प्रवेशनंतर ठाकरे गटाचे कार्यकर्ते चांगलेच आक्रमक झाले आहेत.

वायकर यांनी शिंदे गटात प्रवेश केल्याची बातमी आल्यानंतर उद्धव ठाकरे गटाचे कार्यकर्ते आक्रमक झाले. त्यांनी जोगेश्वरी मेघवाडी येथील शाखेवर असलेल्या बॅनरवरील वायकर यांच्या फोटोला काळे फासले आहे. याचा एक व्हिडीओही समोर आला आहे. ज्यात ठाकरे गटाचा एक कार्यकर्ता फोटोला काळे फासत असल्याचं दिसत आहे. ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

ऐन लोकसभा निवडणुकीच्या तोंडावर वायकर यांनी ठाकरे गटाची साथ सोडल्याने उद्धव ठाकरे यांना मोठा धक्का बसला असल्याचं बोललं जात आहे. वायकर यांनी पक्ष सोडल्याने जोगेश्वरी येथील ठाकरे गटाच्या कार्यकर्त्यांमध्ये मोठा रोष असल्याचं बोललं जात आहे. यातच आज ठाकरे गटाच्या कार्यकर्त्यांनी वायकर यांच्या फोटोला काळे फासले आहे. (Latest Marathi News)

म्हणून मी हा निर्णय घेतला, वायकर यांनी पक्ष सोडल्याचं सांगितलं कारण

दरम्यान शिंदे यांच्या शिवसेन्ट प्रवेश केल्यानंतर रवींद्र वायकर म्हणाले आहेत की, ''गेली ५० वर्ष मी शिवसेनेत जे पडेल ते काम केलेल आहे. चार वेळा नगरसेवक, तीन वेळ आमदार हे पर्यायाने आले. ज्यावेळी मी आता पक्षप्रवेश करतोय, त्या मागचं कारण वेगळ आहे.''

वायकर पुढे म्हणाले, ''कोविडमध्ये कामे झाली नाहीत. पण आता आरेतील रस्त्यासाठी पैसे पाहिजेत. लोक रस्त्यासाठी आणि पाण्यासाठी रडतायत. यासाठी धोरणात्मक निर्णय घ्यावे लागतात. धोरणात्मक निर्णय सत्तेत असल्याशिवाय सोडवाता येत नाहीत. लोक आपल्याला निवडून देतात. आपण काम केलं पाहिजे. सर्व विकासकामांची प्रश्न सोडवण्यासाठी मी इकडे आलोय. नाही सोडवले तर, मग मी लोकांना उत्तर देऊ शकणार नाही. यासाठीच मी इथे आलो आहे.''