अभिजीत देशमुख, साम टीव्ही प्रतिनिधी

कल्याण : मुंबईच्या घाटकोपरमध्ये होर्डिंग दुर्घटना प्रकरणातील आरोपींवर कारवाई सुरु असताना आता कल्याणमध्येही होर्डिंग कोसळण्याची घटना घडली आहे. कल्याणमध्ये भल मोठं होर्डिंग कोसळल्याची घटना घडली. या होर्डिंगखाली अनेक वाहने दबले गेली. या दुर्घटनेत कोणतीही जीवितहानी झाली नाही. मात्र, घटनास्थळी नागरिकांची एकाच धावाधाव झाली. या दुर्घटनेनंतर रस्त्यावर मोठ्या प्रमाणात वाहतूक कोंडी झाल्याचंही पाहायलं मिळालं.

मिळालेल्या माहितीनुसार, कल्याणमध्ये भला मोठा होर्डिंग कोसळल्याची घटना घडली आहे. कल्याणच्या सहजानंद चौकात हा होर्डिंग कोसळल्याची घटना घडली. या दुर्घटेत २ जण जखमी झाल्याची माहिती मिळत आहे. होर्डिंग थेट वाहनांवर कोसळल्याने अनेक गाड्यांचं मोठं नुकसान झालं आहे. तसेच या घटनेनंतर वाहतूक कोंडी देखील झाली.

नेमकं काय घडलं?

कल्याण पश्चिममधील सहजानंद चौकात शुक्रवारी सकाळी १० वाजेच्या सुमारास ही घटना घडल्याची माहिती मिळत आहे. रहदारीच्या या रस्त्यावर होर्डिंग कोसळल्याने वाहनचालकांना फटका बसला. या होर्डिंगजवळ रुग्णालयासहित अनेक दुकाने आहेत. रहदारीचा रस्ता असल्याने वाहनांची पार्किंगही घटनास्थळी होती.

होर्डिंग कोसळताना पार्किंगमध्ये काही गाड्या होत्या. या घटनेत दोन जण किरकोळ जखमी झाल्याची प्राथमिक माहिती मिळत आहे. होर्डिंग कोसळल्याने वाहनांचं मोठं नुकसान झालं आहे. या घटनेनंतर स्थानिक नागरिक आक्रमक झाले. अनेकदा या नागरिकांनी होर्डिंगविषयी तक्रार केली होती. मात्र, महापालिकेने दुर्लक्ष केल्याचा नागरिकांनी केला आहे.