Ratnagiri News: रत्नागिरीमध्ये (Ratnagiri) पतीने पत्नीची हत्या करुन मुलाची देखील हत्या केल्याची धक्कादायक घटना समोर आली आहे. या दुहेरी हत्याकांडाने रत्नागिरी हादरले आहे. याप्रकरणी रत्नागिरी पोलिसांनी (Ratnagiri Police) गुन्हा दाखल केला आहे. फरार आरोपीचा पोलिसांकडून शोध सुरु आहे.

मिळालेल्या माहितीनुसार, रत्नागिरीच्या लांजा तालुक्यातील कोटा गावामध्ये ही घटना घडली आहे. आई आणि मुलाची निर्घृण हत्या करण्यात आली आहे. पतीनेच दोघांची हत्या केली असल्याचा संशय व्यक्त केला जात आहे. लांजा तालुक्यातील कोट गावातील ही मन सुन्न करणारी घटना आहे. सोनाली चांदिवडे (२६ वर्षे) आणि प्रणव चांदिवडे (६ वर्षे) अशी हत्या करण्यात आलेल्या आई आणि मुलाचं नाव आहे.

सोनालीचा मृतदेह घराच्या मागच्या बाजूला आढळून आला. तर प्रणवचा मृतदेह घरामध्ये आढळून आला. सोनालीच्या गळ्यावर धारधार शस्त्राचे वार करत हत्या करण्यात आली आहे. या घटनेची माहिती मिळताच लांजा पोलिसांनी घटनास्थळी धाव घेतली. पोलिसांनी दोघांचे मृतदेह ताब्यात घेत शवविच्छेदनासाठी रुग्णालयामध्ये पाठवले आहेत. पोलिसांनी सोनालीचा पती संदेश चांदिवडेविरोधात गुन्हा दाखल केला आहे. आरोपी सध्या फरार असून पोलीस आरोपीचा शोध घेत आहे.

पोलिसांनी दिलेल्या माहितीनुसार, '१० दिवसांपूर्वी ही महिला घरातून लांजा येथे निघून गेली होती. चार दिवसांपूर्वीच ती घरी परत आली होती. नवरा बायकोच्या भांडणामध्येच ही घटना घडली आहे. पतीनेच पत्नी आणि मुलगा या दोघांची हत्या केल्याचा दाट संशय आहे. पोलिसांनी फिर्याद दाखल करुन घेतली आहे. आरोपीचा शोध घेण्यासाठी पोलिसांनी पथकं रवाना केली आहेत.'