सचिन बनसोडे, अहिल्यानगर प्रतिनिधी

Sangram Jagtap news : अजित पवार यांच्या राष्ट्रवादी काँग्रेसमध्ये प्रदेशाध्यक्षपदावरून रस्सीखेच सुरू असल्याच्या चर्चांना उधाण आले आहे. अशातच पक्षाचे आमदार संग्राम जगताप यांनीही या पदाबाबत आपली इच्छा अप्रत्यक्षपणे व्यक्त केली आहे.

मात्र, "अंतिम निर्णय पक्षश्रेष्ठींचाच असेल," असे स्पष्ट करत त्यांनी संयमी भूमिकाही घेतली. रायगडचे खासदार सुनील तटकरे राष्ट्रवादी काँग्रेसचे विद्यामान प्रदेशाध्यक्ष आहेत. त्यांना कायम ठेवणार की दुसऱ्या नेत्याला संधी दिली जाणार? याची चर्चा सुरू झाली.

राष्ट्रवादी काँग्रेसचे नेते तथा कृषिमंत्री दत्ता भरणे यांनी नुकतेच एका कार्यक्रमात, "पक्षाच्या अध्यक्षा सुनेत्रा पवार यांनी राज्याचे नेतृत्व केले आणि त्या मुख्यमंत्री झाल्या, तर मला आनंदच होईल," अशी भावना व्यक्त केली होती. यावर प्रतिक्रिया देताना आमदार संग्राम जगताप म्हणाले, "अजितदादांशी सर्वांचीच जवळीक आहे. त्याच भावनेतून दत्ता भरणे यांनी ते वक्तव्य केले असावे. मलाही तसेच वाटते. मात्र, जोपर्यंत पक्षाचा अधिकृत निर्णय होत नाही, तोपर्यंत त्यावर भाष्य करणे योग्य ठरणार नाही."

दरम्यान, प्रदेशाध्यक्षपदाबाबत विचारले असता जगताप म्हणाले, "जसे सर्वांना वाटते, तसेच मलाही वाटते. मात्र, प्रत्येकाचीच इच्छा पूर्ण होईल असे नाही. ज्यांच्या नशिबात संधी असेल, त्यांनाच ही जबाबदारी मिळेल. पक्षाच्या अध्यक्षा सुनेत्रा पवार यांच्या मनात जे असेल, त्यानुसार त्या योग्य व्यक्तीवर ही जबाबदारी सोपवतील." संग्राम जगताप यांच्या या सूचक वक्तव्यामुळे आता राष्ट्रवादी काँग्रेसमधील प्रदेशाध्यक्षपदाच्या शर्यतीला आणि राजकीय चर्चांना आणखी बळ मिळाले आहे.