- रामू ढाकणे

Chhatrapati Sambhajinagar News :

तब्बल दहा दिवसानंतर छत्रपती संभाजीनगर शहरातील पाणी पुरवठा सुरळीत झाला आहे. दरम्यान शहरातील अनेक वसाहती अजूनही टँकरवरच अवलंबून असल्याचे चित्र आहे. छत्रपती संभाजीनगरमधील वसाहतींचा पाणी पूरवठा कधी सुरळीत हाेणार असा सवाल उपस्थित केला जात आहे. ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

छत्रपती संभाजीनगर शहराला मुबलक प्रमाणात पाणी आणण्यासाठी ९०० मिमी व्यासाच्या जलवाहिनीची टेस्टिंग करण्यासाठी गत आठवड्यात १० तासांचा शटडाऊन घेण्यात आला होता. गुरुवारी पाणीपुरवठा सुरू झाला असतानाच फारोळ्यात जलवाहिनी निखळली. ती सुरू करण्यास रात्र झाली आणि शुक्रवारी फारोळ्यातच जुनी १२०० मिमीची जलवाहिनी फुटली. यामुळे लाखो लिटर पाणी वाया गेले. त्यामुळे शहरातील पाणी पुरवठा विस्कळीत झाला.

नवीन जलवाहिनीच्या कामासाठी घेतलेला शट डाऊन शहरवासीयांना चांगलाच महागात पडला. दुरुस्तीसाठी सलग चार दिवस लागल्याने शहरातील बहुतांश जलकुंभ हे कोरडे पडले होते. त्यामुळे सिडको भागातील बहुतांश परिसरात 10-12 दिवसाच्या खंडानंतर पाणी वितरण करण्यात आले. (Maharashtra News)

मात्र गुंठेवारी भागातील टँकरचा पाणीपुरवठा बंदच होता. छत्रपती संभाजीनगर शहराचा गेल्या दहा ते पंधरा वर्षात चोहोबाजूंनी झपाट्याने विस्तार जरी झाला असला तरी देखील शहरातील अनेक वसाहती अजूनही टँकरवरच अवलंबून असल्याचे चित्र आहे.

Edited By : Siddharth Latkar