सचिन बनसोडे

शिर्डी : मुळा धरणाच्या पाणलोट आणि लाभक्षेत्रात कालपासून जोरदार पाऊस सुरू आहे. त्यामुळे मुळा धरणाकडे २१ हजार २२८ क्युसेक्सने पाण्याची आवक होत आहे. धरणाकडे पाण्याची होणारी आवक लक्षात घेता धरणाच्या ११ मोऱ्यांद्वारे १५ हजार क्युसेक्सने पाणी जायकवाडीकडे सोडण्यात आले आहे. तर मुळा नदी देखील दुथडी भरून वाहू लागली आहे. (water released from mula dam)

सध्या मुळा धरणातून मोठ्या प्रमाणावर विसर्ग सुरू आहे. पूर परिस्थितीचे योग्य नियंत्रण सध्या धरणस्थळी करण्यात येत आहे. त्यामुळे धरणाच्या सुरक्षिततेच्या दृष्टिकोनातून कुठलाही अनुचित प्रकार घडू नये, यासाठी जिल्हाधिकाऱ्यांच्या आदेशाने धरण परिसरात कलम १४४ लागू करण्यात आले आहे. त्यामुळे पर्यटकांनी धरण परिसरात गर्दी करू नये, असे आवाहन करण्यात आले असून नदीकाठच्या गावांना सतर्कतेचा इशारा देण्यात आलाय, अशी माहिती मुळा धरण शाखेचे उप अभियंता शरद कांबळे यांनी दिली आहे.

दरम्यान, मुळा धरणासाठी मोजक्याच कर्मचाऱ्यांच्या माध्यमातून कामकाज सुरू आहे. अपुरा कर्मचारी वर्ग असल्याने मुळा धरण उपअभियंता शरद कांबळे यांच्या मार्गदर्शनाखाली पहिल्यांदाज राहुरी शाखा क्रमांक १,२,सोनई शाखा तसेच वांबोरी उपशाखा येथील कर्मचारी आठवड्यातून दोन दिवस २४ तास तैनात करण्यात आले आहेत.

Edited By - Naresh Shende