मनोज जयस्वाल 
वाशीम : सर्वत्र पाऊस पडल्याने नदी नाल्यांना पूर आलेला आहे. या पुराच्या पाण्यात अनेकजण स्टंटबाजी करत असतात. परंतु हि स्टंटबाजी जीवावर बेतत असते. असाच प्रकार वॉशिंच्या शेलूबाजार येथे समोर आला असून नदीत उडी घेणारा हा तरुण पुराच्या पाण्यात वाहून गेला होता. ४८ तासांनंतर या तरुणाचा मृतदेह सापडून आला आहे. 

सागर अरुण प्रधान (वय ३०) असे या तरुणाचे नाव आहे. (Washim) वाशीम जिल्ह्यातील अनेक भागात मुसळधार पाऊस झाला होता. यामुळे शेलुबाजार येथील अडाण नदी दुथडी भरून वाहत आहे. या नदीवर असलेल्या पुलावरून वाहणाऱ्या पाण्यात अती उत्साहात स्टंटबाजी करत सागर प्रधान या युवकाने उडी मारली. दरम्यान नदीच्या पाण्याचा वेग प्रचंड असल्यामुळे त्याला बाहेर निघता आले नाही आणि या प्रवाहात तो वाहून गेला होता. तेव्हापासून तो बेपत्ता होता. 

दोन दिवसांनंतर सापडला मृतदेह 

सदर प्रकार परिसरात माहित झाल्यानंतर येथे गर्दी जमली. मंगरूळपीर तहसीलचे तहसीलदार, नायब तहसीलदार, मंडळ अधिकारी, तसेच पोलीस विभागाचे अधिकारी घटनास्थळावर दाखल झाले होते. यानंतर तरुणाचा शोध घेण्यास सुरवात करण्यात आली होती. मागील दोन दिवसांपासून युद्ध पातळीवर सागर प्रधान या युवकाचा नदीपात्रात शोध सुरू होता. मात्र अथक प्रयत्नांनंतर ४८ तासानंतर तरुणाचा मृतदेह संत गाडगेबाबा आपात्कालीन शोध व बचाव पथकाच्या हाती लागला.